Փոքրիկ Ալլան ընդամենը երեքուկես տարեկան է, սակայն արդեն 4 անգամ ենթարկվել է աչքի վիրահատության: Երեխան ի ծնե կույր է. բժիշկների ախտորոշմամբ՝ երեխայի տեսողությունը վնասվել է նոր ծնված ժամանակ, երբ քաշը վերականգնելու համար նրան պահել են հատուկ սարքի մեջ: Արմավիրի մարզի Սարդարապատ գյուղում ծնված այս փոքրիկն արդեն 5-րդ անգամ պետք է մեկնի Սանկտ Պետերբուրգ՝ աչքերը վիրահատելու համար: Պետերբուրգի ակնաբույժները հույս են տվել, որ գոնե աջ աչքը որոշ չափով կտեսնի: «Առավոտի» խմբագրություն այցելած փոքրիկի տատը՝ Ալվարդ Սահակյանը, պատմեց, որ Ալլայի տեսողությունը 4-րդ վիրահատությունից հետո շատ չնչին, բայց վերականգնվել է. երեխան սկսել է լույսին արձագանքել:
Այդուհանդերձ, Ալլային դեռ 7-8 անգամ էլ պետք է վիրահատեն: Ամեն անգամ, երբ գալիս է մեկնելու ժամանակը, երեխայի ընտանիքը սթրեսի մեջ է ընկնում, թե որտեղից է վիրահատության համար անհրաժեշտ գումարը հայթայթելու: Հողագործի ընտանիքը բերքից ստացված եկամտի վրա էլ չի կարողանում հույս դնել: Այս տարի շատ գյուղացիների նման նրանց բերքն էլ կարկուտը փչացրել է. «Մտածում էինք գոնե գումարի մի մասը մենք կդնեինք, բայց մեր ողջ աշխատանքը կարկուտի պատճառով ջուրը լցվեց: Աղջիկ երեխա է, պետք է ամեն ինչ անեմ, որ գոնե մեկ աչքը տեսնի, որպեսզի գոնե որոշ չափով ինքնուրույն լինի»: Ալվարդ Սահակյանի պատմելով՝ ամեն անգամ վիրահատության համար մոտ $4000 է պահանջվում: Փոքրիկի համար «Հայէկոնոմբանկում» բացված է հաշվեհամար՝ 163108014917: Ալլայի աչքի լույսը կարող է վերականգնվել, եթե հավաքվի վիրահատության համար անհրաժեշտ գումարը:
Սեփ. լր.
«Առավոտ» օրաթերթ
