ԲՀԿ-ականները շրջում են այս շենքերում
Մի քանի օր է` Գյումրու ամենամեծ թաղամասի` Անիի բնակիչներից պատմություններ ենք լսում այն մասին, որ ԲՀԿ-ականները «Եհովայի վկաների» պես դռներն են թակում ու «Ծառուկյանն է, չէ՞` ամենալավը» կարգախոսով ակնհայտ քարոզ անում: Նրանք հասցրել են լինել Արամ Խաչատրյան փողոցի գրեթե բոլոր շենքերում` 29, 30, 31, Մինաս Ավետիսյան 31 շենքում, այդ թվում նաև մեր` լրագրողիս տանը:
Ըստ մեր զրուցակիցների, ԲՀԿ-ականները իբրև թե ճշգրտում են ընտրացուցակները, տան անդամների քանակն են հստակեցնում, սակայն նաեւ ճշտում են, թե ում են պատրաստվում ընտրել` ԲՀԿ-ի՞ն, թե՞ հանրապետականին, թիվ 34 ընտրատարածքում մեծամասնական կարգով առաջադրվող ԲՀԿ Շիրակի մարզային կառույցի պատասխանատու Մարտուն Գրիգորյանի՞ն, թե՞ հանրապետականների «դաբրոյով» առաջադրվող «Շիրակ» ֆուտբոլային ակումբի նախագահ Արման Սահակյանին: Ըստ այս թաղամասի բնակիչների, ԲՀԿ-ականները հաշվի չեն առնում ոչ բուք-բորանը, ոչ էլ այն հանգամանքը, որ կան ընտանիքներ, որտեղ այլ կուսակցության ներկայացուցիչներ են ապրում:
Այդպիսի մի դեպք գրանցվել է Գյումրու ծննդատան ՀՀԿ-ական բուժաշխատողներից մեկի տանը. տանը եղել է միայն նրա թոշակառու մայրը, որին համոզել են դառնալ ԲՀԿ-ական:
Ի դեպ, ԲՀԿ-ականները թակել են նաև ՀԱԿ ակտիվիստների դռները, օրինակ՝ Կարապետ Պողոսյանինը, որը բնակվում է Մինաս Ավետիսյան 21 շենքի 53-րդ բնակարանում, նաև 7-րդ փողոցի 4-րդ շենքի 16 բնակարանի բնակիչ Վահագ Խաչատրյանի դուռը: «Ինձանից հետաքրքրվում էին, թե ո՞ւմ եմ ընտրելու` Մարտուն Գրիգորյանի՞ն, թե՞ Արման Սահակյանին, ես էլ պատասխանեցի, թե մեր` ՀԱԿ–ի թեկնածուին: Տհաճ է, որ պաշտոնական քարոզարշավը դեռ չսկսված, մասսայական դռնեդուռ են ընկնում, իբրև թե ցուցակ են ճշտում: Ցուցակ են ուզում ճշտել՝ թող դիմեն կամ ԿԸՀ–ին, կամ ոստիկանությանը, ենթադրենք՝ իմ հարազատները էսօր Ռուսաստանում են, ընտրության օրը Հայաստանում կլինեն, անխտիր բոլորի դռները թակելն ու քարոզ անելը, վերջում էլ իրենց թեկնածուի օգտին պտիչկա դնելը ո՞րն է», -զայրացավ ՀԱԿ անդամ Վահագ Խաչատրյանը:
Կարդացեք նաև
Նունե ԱՐԵՎՇԱՏՅԱՆ
