Aravot.am-ը տեղեկացրել է, որ այսօր ԿԳ նախարարությունում տեղի է ունեցել Ակադեմիական փոխճանաչման եւ շարժունության ազգային տեղեկատվական կենտրոնի ( ԱՓՇԱՏԿ) խորհրդի նիստը, որը վարել է խորհրդի նախագահ, ՀՀ ԿԳ նախարար Արմեն Աշոտյանը: Նիստի մասին ԿԳՆ-ից ստացված հաղորդագրության համաձայն, հաշվետու տարում ԱՓՇԱՏԿ-ի կողմից հայտնաբերվել են օտարերկրյա բուհերի 30 կեղծ դիպլոմներ, որոնց վերաբերյալ կազմվել են արձանագրություններ եւ ներկայացվել իրավասու կառույցներին:
Մեզ հետաքրքրեց, թե ի՞նչ բուհեր են դրանք, ո՞ր երկրների, ովքե՞ր են դիպլոմատերերը: Դրա համար էլ կապվեցինք ԱՓՇԱՏԿ-ի գործադիր տնօրեն Գայանե Հարությունյանի հետ եւ խնդրեցինք՝ մեկ-երկու բուհի անուն նշել, որոնց կեղծ դիպլոմները նշյալ 30-ի թվում են:
«Չեմ կարող նշել, ի՞նչ բուհի անուն նշեմ… հայկական բուհեր չեն»,- ասաց տիկին Հարությունյանը: Պնդեցինք, որ, այնուամենայնիվ, մեկ-երկու օրինակ բերվի: «Չեմ կարող, ընկերուհի ջան, հեռախոսով զանգել եք՝ մի երկու բուհ նշե՞նք»,- չգիտես ինչու, նեղսրտեց տիկինը, չնայած ներկայացել էինք ո՛չ որպես ընկերուհի:
ԿԳՆ հասարակայնության հետ կապերի եւ տեղեկատվության վարչության պետ Արթուր Բաղդասարյանի հետ էլ կապվեցինք: Պարոն Բաղդասարյանը խոստացավ առաջիկայում Aravot.am-ին տրամադրել համապատասխան տեղեկատվություն:
Գոհար ՀԱԿՈԲՅԱՆ
