Մինչ «Մենք ենք այս քաղաքի տերը» նախաձեռնության անդամները փորձում էին փրկել Մաշտոցի այգին՝ շինարարությունն իրականացնող կազմակերպության անդամներն էլ փորձում էին իրենց գործն առաջ տանել: Ակամա լեզվակռիվներ էին տեղի ունենում բնապահպանների եւ շինարարական հիմնարկի աշխատողների միջեւ: Առաջինները պահանջում էին փաստաթղթեր ցույց տալ՝ իրենց գործողությունների օրինական լինելու մասին, երկրորդները պահանջում էին չխանգարել իրենց աշխատանքները, քանի որ իրենք պատվեր ունեն ու իրենց գործն են իրականացնում:
Երիտասարդները փակեցին բետոն բերող մեքենայի ճանապարհը՝ թույլ չտալով հասնել նպատակակետին, եւ ձախողեցին չափագրման աշխատանքները: Մոտ երկու ժամ բետոն բերող մեքենայի վարորդը փորձում էր ճեղքել ակցիայի մասնակիցների պատնեշը, բայց՝ ապարդյուն: Ակցիայի մասնակիցները թույլ չէին տալիս, որ մեքենան առաջ շարժվի: «Նահանջիր, միայն ետ» վանկարկելով՝ կասեցնում էին մեքենայի դեպի առաջ շարժը:
Երբ վարորդը բարկացած իջավ մեքենայից, փորձեցինք հասկանալ, թե ի՞նչ է պատրաստվում անել: Aravot.am-ի հարցից՝ հիմա ի՞նչ պիտի անեք, վարորդը վրդովվեց. «Որ ասեմ պտի ունեմ բետոնը՝ կհավատա՞ք: Բետոն ա, բերել եմ, պտի դատարկեմ»:
Կարդացեք նաև
Այդ ողջ ընթացքում տեղում ներկա ոստիկանները չէին փորձում միջամտել շինարարներ- ակցիայի մասնակիցներ վեճերին: Մի կողմ քաշված հետեւում էին: Մեր հարցերին, թե ինչո՞ւ չեն միջամտում, միայն պատասխանում էին, որ իրենք էստեղ են հասարակական կարգը պահպանելու համար ու իրենց միջամտության կարիքը դեռ չկա:
Նելլի ԳՐԻԳՈՐՅԱՆ
