Անչափահաս հանցագործները Հայաստանում մեծ թիվ են կազմում՝ հանցագործների մոտ 34 տոկոսը: Արդարադատության նախարար Հրայր Թովմասյանի խոսքերով, քիչ չեն նաեւ կրկնակի հանցագործները: Իսկ կրկնակի հանցագործության դեպքերը նախարարը պայմանավորեց դատապարտված անձանցով քիչ զբաղվելու գործոնով:
Նա ասաց, որ Հայաստանում խնդիր կա նաեւ դատապարտված անձանց երեխաների հետ զբաղվելու առումով , որովհետեւ հանցագործ ծնողների երեխաները հիմնականում իրենց ծնողների ճանապարհն են ընտրում:
Նախարարի խոսքերով, այս ու հաջորդ տարիների համար նախարարության առաջնահերթություններից է լինելու նաեւ քրեակատարողական համակարգի զարգացումը:
Նա հայտնեց, որ վերջերս է վերադարձել Գերմանիայից, որտեղ պաշտոնական այցով էր մեկնել ու դրական առումով գլխապտույտ է ունեցել, երբ այցելել է գերմանական քրեակատարողական հիմնարկներ:
Կարդացեք նաև
Պարոն Թովմասյանի խոսքերով, ինքը եւս կարեւորում է Հայաստանում քրեակատարողական հիմնարկները հասցնել եվրոպական մակարդակի:
Նրա խոսքերով, մինչեւ 2013 թվականն ավարտին կհասնի Արմավիրում նախատեսված քրեակատարողական հիմնարկի կառուցումը.: Կահույքից սկսած մինչեւ տեխնիկական վերազինում ու աշխատակիցների բարձր պատրաստվածություն են ապահովելու: Հիմնարկը ունենալու է 3 առանձին մասնաշենք ու նախատեսված է 1200 հոգու համար: Այն կառուցելու համար ծախսվել է մոտ 20 միլիոն դոլար:
Արփինե ՍԻՄՈՆՅԱՆ
