Համամասնական ընտրակարգին անցնելու ԱԺ երեկվա լսումների ժամանակ ՀՀԿ պատգամավոր Հովհաննես Սահակյանը մոնիտորինգ է արել ու տեսել, որ լսումներին ամենաշատ թվով ներկայացված են եղել ՀՀԿ պատգամավորները, իսկ ընդդիմադիր թեւը ներկայացնողներն իրենց ելույթներից հետո լքել են դահլիճը: «Հ/կ–ները նույնպես «րոպեավճարի» հոգեբանությամբ եկան ու ամպագորգոռ ելույթներից հետո շուտ գնացին: Սա այն հարցերի պատասխանն է, որ սա ընդամենը քաղաքական PR էր` ընտրությունների նախաշեմին»,- այսօր «Պոստ Սկրիպտում» ակումբում պարոն Սահակյանի այս դիտարկմանն ի պատասխան` «Ժառանգություն» խմբակցության քարտուղար Լարիսա Ալավերդյանը հակադարձեց. «Արդյոք PR ակցիա չի՞ վիրահատություններ անելը, բնակարան նվիրելը, ակնոցներ բաժանելը: Ամոթ, եթե ես բարեգործություն անեմ ու վեր կենամ ասեմ՝ բարեգործություն եմ արել»:
Լարիսա Ալավերդյանը նշեց, որ 7 պատգամավոր քվեարկել է ուրիշի փոխարեն` հավելելով, որ մոտենում է Մեծ պահքի շրջանը եւ հանրապետականներին Աստված կների:
Aravot.am-ի հարցին, որ կան բազմաթիվ տեսանյութեր, թե ինչպես է մի պատգամավոր քվեարկում ուրիշի փոխարեն, օրինակ՝ Հերմինե Նաղդալյանի քվեարկությունը տեսախցիկները լավ արձանագրել էին, այդ քայլով ո՞ւմ եք ուզում խաբել` ընդդիմությա՞նը, թե՞ քաղաքացիներին, որովհետեւ նրանք ակնհայտ տեսնում են մի բան, դուք արձանագրում եք այլ բան` պարոն Սահակյանը պատասխանեց. «Իսկապես արատավոր երեւույթ է, ես չեմ անում նման բան: Ես չեմ ուզում այստեղ արդարացնել կամ նման մի բան, այնուամենայնիվ, մենք պետք է կարողանանք վեր կանգնել նման երեւույթներից»:
Տիկին Ալավերդյանը նեղացած էր ԱԺ նախագահ Սամվել Նիկոյանի խտրական վերաբերմունքից. «Այսօր Արցախ է մեկնել ԱԺ–ի պատվիրակություն` մասնակցելու 20-ամյակին նվիրված կոնֆերանսին: ԱԺ նախագահը չի ընդգրկել պատվիրակության մեջ եւ չի հրավիրել «Ժառանգության» որեւէ անդամի: Դա ձեւ չի»:
Կարդացեք նաև
Լարիսա Ալավերդյանի տարբեր քննադատություններին ի պատասխան՝ Հովհաննես Սահակյանն ասաց. «Հազար ներողություն, հին ոջիլի պատմությունն եք հիշեցնում: Լավ է՝ այդ Թեղուտի պատմությունն եղավ եւ ձերոնք գնացին գերանների կողքը պառկեցին` նկարվեցին: Չեմ հիշում որեւիցե մի դեպք, երբ Գուգարքից կամ այլ տեղերից բազմաթիվ հարցեր են եղել, ճանապարհ է փլուզվել, մենք բոլորս կանգնել ենք այնտեղ, դուք էլ լինեիք: Փոխարենը` եթե նույն տարածաշրջանից 15 հոգի գային կառավարության առջեւ կանգնեին` անպայման Զարուհի Փոստանջյանն իր կեցվածքով կկանգներ նրանց մեջտեղը եւ կառաջնորդեր շարժումը»: Լարիսա Ալավերդյանը ասաց, որ ոջիլի պատմությունը հիշեցնելու է այնքան ժամանակ, մինչեւ ոջիլը չոչնչանա:
Հռիփսիմե ՋԵԲԵՋՅԱՆ
