Անդրադառնալով այն հարցին, թե այնուամենայնիվ ինչո՞ւ 2008-ին չմիացավ Լեւոն Տեր-Պետրոսյանին, Արթուր Բաղդասարյանն ասել է. «Իսկ ինչո՞ւ պիտի միանայի մի քաղաքական գործչի, որի ամբողջ քարոզչությունն ուղղված էր դեպի մեր կուսակցությունը եւ անձամբ ինձ, երբ ինձ անվանում էր նույնիսկ ազգի դավաճան»:
«ՉԻ»- Արթուր Բաղդասարյանը, իհարկե, ճիշտ է արել, որ չի միացել իրեն «ազգի դավաճան» անվանած Տեր-Պետրոսյանի հետ, այլ գերադասել է կոալիցիոն հուշագիր ստորագրել իրեն «ազգի դավաճան» անվանած Ռոբերտ Քոչարյանի բարձր հովանու ներքո: Այդպես էլ է պատահում. եթե մարդը կանգնած է հյուսիսային բեւեռում, որ ուղղությամբ էլ քայլի՝ դեպի հարավ է շարժվելու: Նույնն էլ Արթուր Բաղդասարյանի դեպքում է. ում հետ էլ համագործակցեր՝ վերջում ստացվելու էր, որ իրեն «ազգի դավաճան» անվանածի հետ է համագործակցել: Դե եթե այդպես է՝ ավելի լավ չէ՞ միանալ նրան, ով համ ազգի դավաճան է անվանում, համ էլ կարգին պաշտոններ է առաջարկում: Այնպես որ՝ Արթուր Բաղդասարյանը միանգամայն ճիշտ է վարվել: Ինչո՞ւ պիտի ծառայություններն անվճար մատուցեր:
«Չորրորդ ինքնիշխանություն»
