Այսօր «Հարավակովկասյան երկաթուղի» ընկերության գրասենյակում տեղի ունեցավ ընկերության նորանշանակ տնօրեն Վիկտոր Ռեբեցին ներկայացնելու պաշտոնական արարողությունը:
Երկար տարիներ ընկերությունը ղեկավարած Շեւքեթ Շայդուլինը նոր աշխատանքի անցավ: Նա կղեկավարի «Ռուսական երկաթուղիներ» ընկերության «Կույբիշեւ» մասնաճյուղային երկաթուղին: Պաշտոնական արարողությունից հետո պատասխանելով լրագրողների հարցերին՝ «Ռուսական երկաթուղիներ» ընկերության նախագահ Վլադիմիր Յակունինը, անդրադառնալով Վանաձոր-Ֆիալետովո երկաթգծի կառուցմանը, ասաց, որ այն համարում է հեռանկարային ու սոցիալական կարեւոր նշանակության ծրագիր: Ինչ վերաբերում է Իրան-Հայաստան երկաթգծի կառուցմանը, նա նշեց, որ այդ ուղղությամբ Իրանն ու Հայաստանը շարունակում են համագործակցությունը.«Ծրագիրը իրատեսական է ու այն կիրականացվի միայն շարունակական համագործակցության արդյունքում»: ՀՀ Տրանսպորտի ու կապի նախարար Մանուկ Վարդանյանն էլ հիշեցրեց, որ վերջին տարիներին աճել է ուղեւորափոխադրումների ու բեռնափոխադրումների շրջանառությունը, մեծացել է երկաթգծի անվտանգությունը.«Ճանապարհը դարձել է անվտանգ ու արագ»:
