Անցած տարի «Հայջրմուղկոյուղի» ՓԲԸ-ն դատի էր տվել Աշոցքի շրջանի սահմանամերձ ու ջրազուրկ գյուղերից մեկի` Սարագյուղի բնակիչներին: Այդ ժամանակ գյուղապետ Յուրա Խչոյանը մեր հետ զրույցում դժգոհում էր, որ Ջրմուղն այնպիսի «ազարտի» մեջ է ընկել, որ դատարան է հրավիրել անգամ գյուղի հանգուցյալներին: Ըստ գյուղապետի, Սարագյուղը մշտապես ջրազուրկ է, եղածն էլ` ցեխաջուր է` վտանգավոր բաղադրությամբ, Սանէպիդի կողմից օգտագործման համար պաշտոնապես արգելված է, եղել են նաև թունավորման դեպքեր: Գյուղապետը մեզ հետ զրույցում նաև պատմում էր, որ մարզպետարանից հյուրեր են եկել, ճանապարհին ծարավել են, սակայն տեսնելով Սարագյուղի ջրի գույնը` վախեցել են խմել:
Ինչպես տեղեկացրել ենք, երեկ «Հայջրմուղկոյուղու» պատասխանատուները եկել էին Շիրակի մարզ` գյուղապետերին համոզելու, որ սպասարկման համար նորից պայմանագիր կնքեն իրենց կառույցի հետ: Հրավիրված պաշտոնյաների շարքում էին նաև Աշոցքի շրջանի գյուղապետերն ու «Հայջրմուղկոյուղի» ՓԲԸ Կենտրոն- Արևմտյան մասնաճյուղի Աշոցքի տեղամասի պետ Արկադի Հասրաթյանը: Մենք այս պաշտոնյայից հետաքրքվեցինք, թե ինչու՞ են մեռածներին անգամ դատի տալիս: Նա մեղքն անմիջապես բարդեց «Հայփոստի» վրա` պնդելով, որ դա եղել է այդ կառույցի թյուրմացության արդյունքում: «Երբ մենք դիմում ենք դատարան` մեր իրավունքների պաշտպանության համար, դա գիտեք իրավական առումով ունի որոշակի ընթացակարգ, նախ քաղաքացին պետք է ծանուցվի իր ունեցած պարտքի վերաբերյալ, նրան պետք է տրվի ժամկետ` պարտքը մարելու համար, դա կատարվում է «Հայփոստի» միջոցով, հետագայում պատվիրված ծրարով քաղաքացին ծանուցվում է, դրանից հետո հետադարձ ծանուցումն է ստացվում` իր ստորագրությամբ, այսինքն ինքը ստորագրել է չէ՞, որ ստացել է: Կամ էլ «Հայփոստից» պիտի ստանայինք համապատասխան ծանուցումը, որ քաղաքացին մահացած է: Դատական նիստի ժամանակ պարզվել է, որ մեկ քաղաքացի մահացած է, այն էլ մեր ծանուցումից մեկ ամիս հետո է մահացել , գործը դատարան գնալուց հետո է մահացել, պատկերացրեք, դե դատարան գնալուց հետո այդ պրոցեսը երկու ամիս է տևում: Ես էլ խնդրել եմ վարույթը կարճել», -ներկայացրեց ջրմուղի պաշտոնյան:
Նա այնպիսի իդեալական վիճակ էր նկարագրում Աշոցքում`24 ժամյա անխափան, բարձորակ, քլորացումով ջրամատակարում, որ քիչ մնաց մոռանայինք, որ թե Սանէպիդը և թե Շիրակի մարզպետարանը պարբերաբար այս տեղանքի ջրի որակի ու ջամատակարարման հարցն են քննարկում:
Նունե ԱՐԵՎՇԱՏՅԱՆ
Կարդացեք նաև
