Երեկ «Արամ Խաչատրյան» համերգասրահում տեղի ունեցավ համերգ՝ հայ-չինական դիվանագիտական հարաբերությունների հաստատման 20-ամյակի առիթով, որին մասնակցում էր ՉԺՀ-ի Լանջոյի համալսարանի երաժշտական խումբը: Համերգը կազմակերպվել է ԵՊԼՀ-ի Կոնֆուցիուսի ինստիտուտի եւ Հայաստանում չինական դեսպանատան հետ համատեղ:
Երեւանի պետական լեզվաբանական համալսարանի ռեկտոր Սուրեն Զոլյանը փաստեց, որ Չինաստանի հետ հարաբերությունների զարգացումը գերակա խնդիր է, իսկ մշակույթի եւ կրթության ոլորտում իրականացվող քաղաքական երկխոսություններն էլ ավելի են զարգացել. «Մենք կապող օղակ ենք հանդիսանում մշակութային երկխոսության առումով: Չինարենը մեծ պահանջարկ ունի եւ շնորհիվ Կոնֆուցիուսի ինստիտուտի՝ հայ ուսանողները հնարավորություն ունեն չինարեն սովորել»: Լանջոյի համալսարանի ռեկտոր Ծինք Թաոն նշեց, որ ՀՀ անկախացումից հետո Չինաստանն առաջին երկրներից էր, որ դիվանագիտական հարաբերություններ հաստատեց Հայաստանի հետ, ինչը 20 տարիների ընթացքում տվեց լավ արդյունք:
Հավելենք, որ Լանջոյի համալսարանը ունի 102 տարվա պատմություն եւ 30.000 ուսանող: Ինչ վերաբերում է բուհի՝ Հայաստան ժամանած երաժշտական խմբին, այն կատարեց չինական ժողովրդական երաժշտություն եւ ազգային պարեր: «Առավոտի» հետ զրույցում համերգի հանդիսավար, Լանջոյի համալսարանի անգլիական ֆակուլտետի ուսանողուհի Քի Չենը ասաց, որ չինական մշակույթում կարեւորում է ավանդական ժողովրդական երաժշտությունը, իսկ հայկական մշակույթից հատկապես տպավորված է ճարտարապետությամբ: «Այն հին է եւ բարձրաճաշակ: Հայ ժողովուրդը բարի է, հյուրընկալ եւ միշտ պատրաստ՝ օգնել: Այստեղից ինձ հետ կտանեմ հուշանվերներ եւ մարդկանց հաճելի վերաբերմունքը»,- ասաց Քի Չենը:
ԼՈՒԻԶԱ ՍՈՒՔԻԱՍՅԱՆ
Կարդացեք նաև
«Առավոտ» օրաթերթ
