ՀՀ նախկին արտգործնախարար Վարդան Օսկանյանի հայտարարությունը՝ ԲՀԿ-ի համամասնական ցուցակում ընդգրկվելու մասին, «Ժառանգություն» խմբակցության պատգամավոր Ստեփան Սաֆարյանի կարծիքով՝ որեւէ մեկի համար անակնկալ չէր: Aravot.am-ի հետ զրույցում պարոն Սաֆարյանը նկատեց, որ այս համատեքստում մտորելու տեղիք է տալիս երկու օր առաջ կոալիցիոն կուսակցությունների կայացրած որոշումը՝ համաձայնության շրջանակների վերաբերյալ. «Չեմ կարող ասել, թե ի՞նչ է ակնարկում Օսկանյանը՝ հայտարարելով, որ ԲՀԿ-ի ցուցակում է ընդգրկվելու, ինչի՞ մասին են խոսում այս փաստերը: Կարծում եմ՝ ժամանակը ցույց կտա»:
Հետաքրքրվեցինք՝ արդյոք այսպիսով չե՞ն մեծանում ՀՀ երկրորդ նախագահ Ռոբերտ Քոչարյանի՝ քաղաքականություն վերադառնալու շանսերը: Ստեփան Սաֆարյանը պատասխանեց. «Սա կարելի է ենթադրել նրանից, որ ամիսներ շարունակ շատերն էին քննարկում այս սցենարը, շատերն էին խոսում, որ Քոչարյանը ոչ թե միանգամից կվերադառնա, այլ Վարդան Օսկանյանի մուտքը դա կազդարարի: Այս փաստը ամրապնդում է այդ վարկածը: Ես սա ասում եմ ոչ թե որպես բացարձակ ճշմարտություն, այլ որպես տարածված խոսակցություն»:
Նելլի ԳՐԻԳՈՐՅԱՆ
