Կոալիցիոն կուսակցությունները, խոշոր հաշվով, նույն մարմնի երեք գլուխն են: Իսկ այն, որ դրված է առանձին ցուցակներով մասնակցելու խնդիրը, հասկանալի է` վերցնել հնարավորինս շատ տեղեր: Սակայն արդեն այսօր ակնհայտ է, որ առանձին ցուցակով մասնակցելու դեպքում կոալիցիոն ուժերից մեկը` ՕԵԿ-ը, ամենայն հավանականությամբ, չի հաջողի անցնել անհրաժեշտ շեմը: Վկան` փետրվարի 12-ի ՏԻՄ ընտրություններն են: Համաձայն ԿԸՀ հրապարակած տվյալների` Արթիկի տարածքի Գեղանիստ համայնքում առաջադրված ՕԵԿ ներկայացուցիչ Արտյոմ Ալեքսանյանը պարտվել է իր անկուսակցական մրցակցին: Նահապետավանում եւս ՕԵԿ թեկնածու Սաշա Վարդանյանը պարտվել է: Եվ դարձյալ` անկուսակցական մրցակցին:
Պատրա՞ստ է ՀՀԿ-ն հաշտվել իրականության հետ` կոալիցիայում մնալ մեկ եւ ոչ շատ վստահելի գործընկերոջ` ԲՀԿ-ի հետ: Եթե ոչ, ո՞ւմ ձայների հաշվին կկեղծվեն ընտրությունները:
Իսկ այն, որ դրանք կեղծվելու են, ցույց տվեց Հրազդանի քաղաքապետի ընտրությունը: ՀԱԿ թեկնածու Սասուն Միքայելյանը, ով մեծ հեղինակություն էր վայելում, պարտվեց գործող քաղաքապետին` մոտ 1500 ձայնով: ՀԱԿ-ը սպասում էր նաեւ ԲՀԿ-ի՞ աջակցությանը: Այն, ինչպես եւ ակնկալվում էր, չեղավ: Սակայն այս ընտրությունը փաստեց, որ ընդդիմությունն ինքնուրույն չկարողացավ ապահովել Սասուն Միքայելյանի արդար հաղթանակը: Եվ ոչ մի երաշխիք, որ մայիսին նույնը չի կրկնվի:
Լիլիթ ԱՎԱԳՅԱՆ
Կարդացեք նաև
«168 ժամ»
