ՀՀ ոստիկանության պաշտոնական կայքէջը թյուրիմացության մեջ էր գցել մեր ընթերցողներին: Պատճառը «Հասարակական խորհուրդ» բաժնի «Հանդիպում հասարակական խորհրդում» տեղեկատվությունն էր: Ըստ այդ տեղեկատվության, դեկտեմբերի 2-ին ՀՀ ոստիկանությանը կից հասարակական խորհրդի դահլիճում տեղի է ունեցել հանդիպում Ճանապարհային ոստիկանության ղեկավարության հետ: Չի նշվում, թե որ տարվա դեկտեմբերի 2-ին ու օպերատիվ կառույցի տրամաբանությունից ելնելով՝ ընկալում ես, որ հասարակական խորհրդի վերջին նիստը տեղի է ունեցել անցյալ տարվա դեկտեմբերի 2-ին: Լսվում է Ճանապարհային ոստիկանության կատարած աշխատանքների մասին, դրական տեղաշարժի մասին, որը «հանրապետության քաղաքական ղեկավարության եւ ոստիկանության պետի խիստ ցուցումի արդյունքն են»: Ըստ պաշտոնական տեղեկատվության, ՀՀ ոստիկանության հասարակական խորհրդի որոշմամբ շնորհակալագիր է հանձնվում Ճանապարհային ոստիկանության պետ Մարգար Օհանյանին՝ նրա ղեկավարած կառույցի հետ ակտիվ համագործակցության համար: Մեր ընթերցողները հարցնում էին, թե ինչ ձեւով է հանձնվել ազատազրկված Մարգար Օհանյանին այդ շնորհակալագիրը:
Ռ. Մ.
