Այսօր «Հայելի ակումբում» հյուրընկալված ՀՀ ԱԺ պատգամավորներ Կարեն Ավագյանը (ՀՀԿ) և Ստեփան Սաֆարյանը («Ժառանգություն») մեկնաբանեցին Հրազդանի քաղաքապետի երեկ կայացած ընտրությունները: Ս. Սաֆարյանը վստահեցրեց. «Լարվածությունը զգալի էր, ողջ օրվա ընթացքում միակ սպասումը կապված էր ընտրակեղծիքի հետ: Ընտրական գործընթացներին հետևող իմ գործընկերներն արձանագրել են մի շարք միջադեպեր: Այդ գործընթացներում պահպանվում է վարչական և ֆինանսական լծակներ կիրառելու արատը: ՀՀ-ում ոչ միայն այս, այլև մյուս բոլոր ընտրությունները չի կարելի անվանել հավասար մրցակցային, քանի որ իշխանության թեկնածուն ունի բազում լծակներ»: Կ. Ավագյանն էլ նկատեց. « Ձեր գործընկերների դիտարկումները բամբասանքների շարքից են: Նաև ուզում եմ ասել, որ այսօր Սասուն Միքայելյանի շտաբից հաղորդագրություն է տարածվել, որտեղ խոսք չկա որևէ ընտրատեղամասի հետ կապված բողոքարկման մասին: Սրա պատճառն է նաև այն, որ հաղթանակի հարաբերակցությունը մեծ է և ֆիքսված խախտումներ չեն արձանագրվել, իսկ մնացածը ընդհանուր խոսակցություններ են: Եթե չեն կարողանում ապացուցել, նման փաստերը իրավական շարունակականություն ունենալ չեն կարող»: Ս. Սաֆարյանն էլ հակադարձեց. «Եթե մարդը քաջություն չունի ասելու, որ իրեն փողով են բերել ընտրությունների, ի՞նչը բողոքարկել»: Կ. Ավագյանն էլ կասկածանքով հարցրեց՝ մի՞թե բոլորը փող են վերցրել, բոլորին փողով են բերել: Ս. Սաֆարյանն էլ ասաց, թե մի օր միասին կգնան ընտրության և ցույց կտա, թե ով է փողով եկել:
Այնուհետև ՀՀԿ-ական պատգամավորը հավելեց.«Ընդդիմադիր բոլոր կուսակցությունները, ովքեր սատարում են Սասուն Միքայելյանին չկարողացան ապահովել հաղթանակ նույնիսկ Ընտրական նոր օրենսգրքի գործարկման պարագայում, որը վստահված անձանց մեծ հնարավորություններ է տալիս: Ուստի սա մեր ընտրողների գնահատականն է ընդդիմադիր կուսակցություններին»: Մյուս բանախոսն էլ հակադարձեց. «Դա ոչ թե ընտրողների գնահատականն է, այլ մանիպուլյացիաների արդյունք: Վստահված անձանց բացակայության ժամանակ իրենք իրենցով են եղել և ինչ ուզել արել են: Սասուն Միքայելյանի շտաբից էլ հաղորդագրություն է տարածվել թաց կնիքների մասին»: Ս. Սաֆարյանը խոսեց նաև ընտրության ընթացքում հոսանքի անջատման մասին՝ ներկայացնելով այն որպես ընտրակեղծիքներին նպաստելու հանգամանք: Կ. Ավագանը մեկնաբանեց, որ դրանք տեխնիկական խնդիրներն են, բացի այդ մեր ժողովուրդ ունի այդպիսի բազում խնդիրներ՝ գազի, ջրի, հոսանքի և այլն: Նա գործընկերոջը խորհրդի կարգով ասաց, թե ԵԺԿ կուսակցությանը անդամակցեք, ընկերություն արեք, բայց փաստերը ձեռքից վայր մի դրեք:
