Պեմզաշենի նախկին գյուղապետ ՀՀԿ-ական Երվանդ Միքայելյանին ՀՀԿ-ն սատարում է «մոտավորապես»
Ինչպես տեղեկացրել ենք, այսօր Շիրակի
Պեմզաշենի ներկայիս անկուսակցական գյուղապետը վստահ է, որ մինչեւ 2030-ը ինքն է լինելու գյուղապետը:
մարզի ամենամեծ համայնքներից մեկում` Պեմզաշենում , գյուղապետի պաշտոնի համար թեժ ընտրապայքարի էին դուրս եկել նախկին ու ներկա գյուղապետերը` ՀՀԿ-ական Երվանդ Միքայելյանն ու գեներալ Մանվելի սանիկ, ԵԿՄ-ական Անան Ոսկանյանը: Վերջինիս սատարելու համար քավոր գեներալը Պեմզաշեն էր ուղարկել ԵԿՄ-ականներին, որոնք էլ տասնյակ ջիպերով շրջափակել էին գյուղը` նախապես քեֆ-ուրախություն անելով:
Մենք գեներալի սանիկից` գործող գյուղապետ Անան Ոսկանյանից հետաքրքվեցինք, թե ինչո՞ւ են այսքան մեծ թվով ջիպավորներ ժամանել Պեմզաշեն, ԵԿՄ-ականները եկել են իրեն «պադեռժկա» անելո՞ւ: «ԵԿՄ-ականները երկրին էլ են պադեռժկա անում, եթե այդպես ես տալիս հարցը, այդպես պատասխանեմ»,- ասաց նա: Մեր դիտարկմանն ի պատասխան, թե իրենց ներկայությամբ չեն խանգարո՞ւմ ընտրական գործընթացին, գեներալի սանիկը վստահեցրեց , որ նրանք ընտրություններին չեն միջամտում, չեն խանգարում, պարզապես գալիս են իրենց ընկերոջը տեսնելու: «Ես մեղավոր չեմ, որ հանրապետությունում իմ ընկերներն են բոլորը: Դու ո՞նց ես պատկերացնում, ուզում ես իմ ընկերները զապոյո՞վ լինեն: Իմ ապրած կյանքը ինձ թույլ է տալիս, որ իմ ընկերական շրջապատը մեծ լինի»,- ասաց գյուղապետը` տեղեկացնելով, որ ինքն էլ ջիպ ունի:
Իսկ ի՞նչ գումարով է գնել մեքենա. գյուղապետի համեստ աշխատավարձո՞վ` հետաքրքրվեցինք: «Ես մինչև գյուղապետ լինելն եմ ջիպով եկել, գյուղապետ դարձել», ասաց նա: Դժվա՞ր չէ անկուսակցական լինել ու վերևներում հարցեր լուծել` հարցրեցինք գյուղապետին: «Ես դրա հետ կապված խնդիրներ չեմ ունեցել և չեմ էլ ունենալու, որովհետև իմ անձնական հարաբերություններս էսօր հանրապետությունում հնարավորություն են տալիս ազատ շարժվելու, և էսօր իմ ընկերների գերակշիռ մասը պետական պաշտոնյաներ են , ունեմ լավ, մեծ ընկերական կապեր, որոնք ի շահ ծառայեցնում եմ պեմզաշենցիներին: Կուսակցական լինելն էլ պարտադիր չէ, կարևորը լավ հայ ու համայնքապետ լինելն է», -պատասխանեց գյուղապետը` միաժանակ ակնարկելով, որ ԵԿՄ-ի մեջ կան տարբեր կուսակցականներ, որոնք իրենց ընկերներն են:
Կարդացեք նաև
Ի դեպ, գյուղապետն անչափ վստահ էր, որ նորից ինքն է վերընտրվելու, և մրցակցի մասին խոսում էր այնպես, կարծես իր ախոյանն էր: Նա պեմզաշենցիների անունից հայտարարեց, որ համայնքը նախկին գյուղապետին տանել չի կարող, նաև ասաց, որ ՀՀԿ-ական Երվանդ Միքայելյանը ոչ միայն համայնքին պետք չէ, այլ հանրապետական կուսակցությանը: «Էս պարագայում Հանրապետականը իրա հետ կապված ոչ մի դերակատարություն չունի. Հանրապետականին կարելի է ասել իր համար սարքել է քաղաքական ուժ, բայց ինքը գոյություն չունի նույնիսկ Հանրապետական կուսակցության համար: Եթե իրան հարցնեք` ի՞նչ է Նժդեհի գաղափարախոսությունը, համոզված եմ, որ տեղյակ չէ: Ես ավելի շատ եմ տեղյակ Նժդեհից, դե ես հայ տղա եմ, էս երկրի, էս պետության, պետականության ստեղծման մեջ ես մասնակցության ունեցող անձնավորություն եմ եղել` ի տարբերություն իրեն: Կարելի է ասել` անիմաստ է մյուս թեկնածուի առաջադրվելը», -ասաց գեներալ Մանվելի սանիկը` հայտարարելով, որ գյուղապետը ինքն է լինելու` մինչև 2030թ-ը: Իսկ ինչո՞ւ այդքան երկար`Aravot.am-ի այս հարցին էլ նա պատասխանեց. «Որովհետև գյուղը ուզում եմ դարձնել քաղաք»: Ի դեպ, նա երեք տարի է ` ինչ գյուղապետ է, և ըստ իր խոսքերի, արդեն իսկ հասցրել է լուծել գյուղի գլոբալ խնդիրները` փողոցների, լուսավորման, ջրամատակարարման և այլն:
Մենք զրուցեցինք նաև նրա մրցակցի`Երվանդ Միքայելյանի հետ, որը վեց տարի շարունակ գյուղապետ է աշխատել , սակայն նախորդ ՏԻՄ ընտրություններին իր տեղը զիջել էր գեներալի սանիկին: Նա տեղեկացրեց, որ իր թեկնածությունն առաջադրում է ժողովրդի կամքով: Նաև ասաց, որ ՀՀԿ-ական է դարձել գյուղապետի պաշտոնը լքելուց հետո, բայց հոգով, սրտով միշտ էլ այս կուսակցությանն է սատարել: Իսկ ՀՀԿ-ն նույն ձևով սատարու՞մ է իրեն` մեր հարցին նախկին գյուղապետը պատասխանեց այսպես` «Մոտավորապես»: Եվ վստահեցրեց, որ գյուղում կուսակցական լինելը բացարձակապես նշանակություն չունի: Ի դեպ, նույնը պնդում էր նաև նրա մրցակիցը: Ավելին, Անան Ոսկանյանի ասելով, այսօր Պեմզաշենին բարեկամ ու խնամի պետք չեն, այլ անհրաժեշտ է աշխատող գյուղապետ: Հետաքրքիրն այն է, որ Անան Ոսկանյանը երրորդ թեկնածուին չէր ճանաչում. ոչ նրա առաջադրվելուց ու ոչ էլ թեկնածությունն հանելուց էր խաբար:
Նունե ԱՐԵՎՇԱՏՅԱՆ
