Հայաստանում է կրասնոդարցի երգչուհի Մարիետա Դերլուղյանը՝ իր առաջին CD-ն ձայնագրելու նպատակով: Վոկալիստների համառուսաստանյան մրցույթի դափնեկիր (2007թ.) կոլորատուրային սոպրանոն տասը տարի պրոֆեսիոնալ բեմում է, ինչը զուգահեռում է Կրասնոդարի Սուրբ Հովհաննես, իսկ 2010-ից էլ՝ Սուրբ Մեսրոպ եւ Սահակ եկեղեցիներում հոգեւոր երաժշտություն հնչեցնելով:
«CD-ի ձայնագրման, հետագայում թողարկման աշխատանքներին աջակցում է Կրասնոդարի Պաշկովյան շրջանի հայկական մշակութային կենտրոնը: Ձայնագրությունները կիրականացվեն Ռուբեն Ասատրյանի ղեկավարած «Վերածնունդ» կամերային նվագախմբի ընկերակցությամբ: CD-ում տեղ կգտնեն հոգեւոր երգեր, Կոմիտաս, Բաբաջանյան, մի խոսքով՝ միայն հայկական երաժշտություն»,- տեղեկացրեց երգչուհին: Հավելեց նաեւ, որ ընտանեկան հանգամանքներից ելնելով՝ հիմնական բեմական գործունեությունը ընթացել է ծննդավայրում եւ Ռուսաստանի այլ քաղաքներում:
Հետաքրքրությանը, թե ինչու է ընտրել ազատ արվեստագետի ուղին, օրինակ՝ չընդգրկվելով Կրասնոդարի ճանաչված երաժշտական թատրոնում, Մարիետա Դերլուղյանը պատասխանեց հարցի երկրորդ մասին. «Շուտով բալետային տարբերակով թատրոնում բեմադրվելու է ժամանակակից ներկայացում՝ ըստ Մոցարտի «Կախարդական սրինգի», որտեղ ինձ հրավիրել են կատարելու գիշերային թագուհու արիան: Թատրոնում մշտապես ներկայացումներ են իրականացնում անվանի բեմադրիչներ, այդ թվում՝ Յուրի Գրիգորովիչը, Ալեքսեյ Ստեպանյուկը, Դմիտրի Բերտմանը եւ ուրիշներ, խաղացանկում են Խաչատրյանի «Սպարտակը», Բիզեի «Կարմենը», Չայկովսկու «Եվգենի Օնեգինը» եւ այլ գլուխգործոցներ»: Երգչուհին նշեց, որ դժգոհ չէ ազատ արվեստագետի իր կարգավիճակից. «Վերջերս եկեղեցում իմ ելույթով տպավորվել էր աշխարհահռչակ Միշել Լեգրանը, նրա ռուսաստանյան պրոդյուսերն էլ խոստացել է, որ մաեստրոն ինձ կներկայացնի Ֆրանսիայի հանդիսատեսին»:
Զրույցի ընթացքում երգչուհին անընդհատ խոսում էր կոնկրետ Կրասնոդարում բնակվող տաղանդավոր հայազգի երաժիշտներից: Ռեպլիկին, թե ի վերջո նրանցից ո՞վ է «ամենան», մեր զրուցակիցը տվեց տաղանդավոր սաքսոֆոնահար, ջազմեն Գեորգի Գարանյանի անունը:
Կարդացեք նաև
Հարցին՝ մտադիր չէ՞ ներկայանալ նաեւ հայաստանցի հանդիսատեսին, Մարիետա Դերլուղյանը պատասխանեց. «CD-իս ձայնագրման աշխատանքների ավարտից հետո կուզեի ներկայանալ Ալ. Սպենդիարյանի անվան օպերային թատրոնի խորհրդին…»: Ի դեպ, նա տեղեկացրեց, որ Կրասնոդարում շատ է խոսվում այն մասին, թե ճանաչված օպերային տենոր Գեղամ Գրիգորյանը Գառնիում հիմնելու է մեկ այլ օպերային թատրոն:
ՍԱՄՎԵԼ ԴԱՆԻԵԼՅԱՆ
Հ. Գ. Գեղամ Գրիգորյանն այս օրերին Վիլնյուսում է գտնվում: Նրանից համապատասխան մեկնաբանություն կստանանք, երբ վերադառնա Հայաստան:
«Առավոտ» օրաթերթ
