Հատված «Հայոց Աշխարհ»-ի հետ «Բարգավաճ Հայաստան» խորհրդարանական խմբակցության անդամ, եվրաինտեգրման հարցերի հանձնաժողովի նախագահ Նաիրա Զոհրաբյանի հարցազրույցից:
-Ինչպե՞ս եք ընդունում «Կանխիկ գործառնությունների մասին» նախագիծը բոյկոտելուց հետո «Բարգավաճ Հայաստանի» հասցեին հնչած քննադատությունը։
–Ես իմ հայտարարության մեջ հստակ ներկայացրել եմ «Բարգավաճ Հայաստանի» դիրքորոշումը` այդ օրինագծի հետ կապված, հիմնավորել եմ, թե ինչու չենք մասնակցելու այդ օրվա նիստերին։ Կարող եմ եւս մեկ անգամ փաստել, որ ԲՀԿ-ն իր առջեւ խորհրդարանի բնականոն աշխատանքը խաթարելու խնդիր չի դրել եւ բացարձակապես նպատակ չի հետապնդել տապալելու խորհրդարանում անցկացվելիք քվեարկությունները։ Կարծում եմ, բոլորի համար պարզ եւ հասկանալի եղավ, թե ինչով էր պայմանավորված «Բարգավաճ Հայաստանի» որոշումը։ Մենք եւ բացառապես մենք ենք որոշում մեր քայլերը, պատասխանատու եւ հաշվետու ենք բացառապես մեր ընտրողի, մեր ժողովրդի առջեւ։
-Աշոտ Ավետիսյանի` «Բանգլադեշի Համոյի» ազատ արձակվելուց հետո լրատվամիջոցներում շրջանառության մեջ դրվեց մի վարկած, ըստ որի` ձեր «կամակորությունը» նախագծի հետ կապ չուներ. քվեարկությունը բոյկոտելով` ԲՀԿ-ն ընդամենը փորձում էր ճնշում գործադրել իրավապահների վրա։ Եվ հիմա, երբ «միջադեպը» հարթված է, կոալիցիոն նոր հուշագրի ստորագրման հարցը կարելի է լուծված համարել։
–Ոստիկանության հասարակայնության հետ կապերի վարչության տարածած հաղորդագրության մեջ հստակ ձեւակերպված են Ա.Ավետիսյանի նկատմամբ խափանման միջոցը փոխելու հիմնավորումները։ Ավելացնելու ոչինչ չունեմ եւ խնդիրը քաղաքականացնելու, քաղաքական դաշտ տեղափոխելու որեւէ պատճառ չեմ տեսնում։ Ինչ վերաբերում է կոալիցիոն նոր հուշագրին, որեւէ տեղեկություն չունեմ այդ մասին, բնականաբար չեմ կարող ենթադրություններ անել մի բանի վերաբերյալ, որին տեղյակ չեմ։ Ավելին` «Բարգավաճ Հայաստան» կուսակցության քաղաքական խորհրդում, խմբակցությունում նման հարց չի քննարկվել։
-Որեւէ բացատրություն ունե՞ք, թե ինչու Եվրոպական ժողովրդական կուսակցությունը դիտորդ-անդամի կարգավիճակ շնորհեց ՀՀԿ-ին, ՕԵԿ-ին եւ «Ժառանգությանը»` բացառություն անելով ԲՀԿ-ի համար։
–Մեզ համար ակնհայտ է, որ ԵԺԿ-ն քաղաքական որոշում է կայացրել։ Բնականաբար այդ որոշումը առնչություն չունի այս կամ այն կուսակցության առավել կամ պակաս ժողովրդավար կամ «եվրոպամետ» լինելու հետ։ Ինչով էր պայմանավորված ԵԺԿ քաղաքական դիրքորոշումը` չգիտեմ, որովհետեւ ԵԺԿ ղեկավարությանն ուղղված իմ հարցադրմանը որեւէ սպառիչ պատասխան այդպես էլ չտրվեց։
