ՀՀ վերաքննիչ քաղաքացիական դատարանը մերժել է «Հայջրմուղկոյուղի» ՓԲԸ բողոքը և ուժի մեջ է թողել Սյունիքի մարզի ընդհանուր իրավասության դատարանի որոշումը:
«Բաց հասարակության ինստիտուտի օժանդակություն» հիմնադրամ հայաստանյան մասնաճյուղի և «Էկոլոգիական անվտանգության ապահովման եւ ժողովրդավարության զարգացման» հասարակական կազմակերպության աջակցությամբ մի խումբ կապանցիներ 2010 թվականի հոկտեմբերի 15-ին դիմել էին Սյունիքի մարզի ընդհանուր իրավասության դատարան՝ ընդդեմ «Հայջրմուղկոյուղի» ՓԲԸ` պահանջելով դատարանից ընկերությանը պարտավորեցնել` կատարելու բաժանորդների հետ կնքված պայմանագրերով ստանձնած պարտավորությունները, այն է` ապահովել կենցաղային կեղտաջրերի հեռացումն ու մաքրումը: Երկրորդը` վերացնել մարդկանց առողջությանն ու բարեկեցությանը նպաստող շրջակա միջավայրին սպառնացող վտանգը:
2011թ. Մարտի 24-ին Սյունիքի մարզի ընդհանուր իրավասության դատարանը
բավարարեց հայցն ընդդեմ «Հայջրմուղկոյուղի» ՓԲԸ-ի: Ընկերությունը բողոքարկել էր հայցը եւ դիմել ՀՀ վերաքննիչ դատարան:
Ըստ «Էկոլոգիական անվտանդության ապահովման և ժողովրդավարության զարգացման» հասարակական կազմակերպության իրավախորհրդատու Արթուր Ղազարյանի` որոշումն ընդունելուց հետո այն նախադեպ կլինի եւ ոչ միայն հայցվոր կապանցիների համար կկիրառվի դատարանի կայացրած վճռի կատարումը, այլ նաեւ շոշափելու է ընկերության մյուս 275 հազար բաժանորդների իրավունքները:
Մերի ՍՈՂՈՄՈՆՅԱՆ
