ՀՅԴ խմբակցության ղեկավար Վահան Հովհաննիսյանը խորհրդարանական ճեպազրույցի ժամանակ կարեւորեց «Թիկնազորային ծառայության մասին» օրինագծի ընդունումը:
Վահան Հովհաննիսյանը հիշեցրեց, որ ՀՅԴ խմբակցությունն այս նախագիծը ներկայացրել էր 2000-ականների սկզբին, երբ այն ժամանակվա խմբակցությունը հայտարարել էր, որ այնպես, ինչպես համալրվում է թիկնազորային ծառայությունը Հայաստանում` հատկապես օլիգարխների շուրջ, անընդունելի է: Նա նշեց, որ անցել է ութ տարի եւ իշխանությունները մերժել են ընդունել այս օրենքը, իսկ հիմա ընդունվել է, քանի որ այս նախագծի համահեղինակներից են նաեւ հանրապետական որոշ պատգամավորներ:
Լրագրողների խնդրանքով` Վահան Հովհաննիսյանն անդրադարձավ երեկվա կրկնակի քվեարկություններին, ասաց, որ դա առաջին դեպքը չէ եւ ավելի «արտառոց վայրագություններ» էլ են եղել:
«Դա նշանակում է, որ իշխող քաղաքական ուժը իրականության մեջ ուժ չէ, այլ ուժ է` ուժի զոռով: Ո’չ համոզելու, ո’չ էլ իր ասածը որպես ճշմարտություն տեղ հասցնելու ունակություն այլեւս չունի: Փաստորեն, նույնիսկ սեփական խմբակցության քվեարկությունը կազմակերպել չի կարողանում»,- ասաց նա:
Վահան Հովհաննիսյանի խոսքերով` դրա ավելի վառ օրինակը եղավ այն ժամանակ, երբ ԲՀԿ-ն բոյկոտեց նիստը, եւ պարզվեց, որ բացարձակ մեծամասնություն ունեցող Հանրապետականը չի կարողանում օրենք անցկացնել:
«Եթե Հանրապետականն ու դրա ղեկավարները նույնիսկ մի օրենք անցկացնելու հարցն ավելի բարձր են գնահատում, քան պետության իմիջը, ԱԺ արժանապատվությունն ու իրենց սեփական արժանապատվությունը, եթե այս դեպքում նպատակին հասնելու համար ցանկացած միջոցի դիմում են, ուրեմն միշտ էլ կգնան»,- ասաց դաշնակցական պատգամավորը:
Կարդացեք նաև
Նրա համոզմամբ` երեւույթը նոր չէ, բայց փորձել հաղթահարել սեփական անզորությունը, տասը մարդու փոխարեն կոճակ սեղմելով, բնութագրում է ոչ միայն կոնկրետ սեղմողներին, այլեւ ամբողջ քաղաքական համակարգի մասին է խոսում: «Եթե դու նպատակիդ հասնելու համար կարող ես թքել ու շրջանցել օրենքը, ես ինչո՞ւ պետք է հավատամ, որ արդար ընտրություն կանցկացնես»,- հայտարարեց Վահան Հովհաննիսյանը:
