Վրաստանի հետ սահմանակից Դեղձավանում հողերի չափագրումների հետ կապված խախտումները բազմաթիվ են, ինչի պատճառով գյուղացիների միջեւ լարվածություն է: Փետրվարի 7-ին Դեղձավան համայնքի ղեկավար Ռուբիկ Հովհաննիսյանը գյուղ այցելած Տավուշի մարզպետ Արմեն Ղուլարյանին ներկայացրեց իրավիճակը.
–Մարդ 20 տարի մշակել է հողը, հիմա քարտեզով պարզվել է, որ դա հարեւանինն է, կարող է դանակահարություն լինել:
Մարզպետն ասաց, թե կադաստրային քարտեզի տակ ստորագրել է նաեւ համայնքի ղեկավարը եւ գյուղապետից հետաքրքրվեց, թե 5-6 տարի առաջ կատարված քարտեզագրման ժամանակ ինչո՞ւ գյուղացիները չեն ճշտել իրենց հողակտորների սահմանները: Գյուղապետը տեղեկացրեց, որ իրենք գյուղապետարանի առաջ մի ամիս շարունակ համապատասխան հայտարարություն էին փակցրել, սակայն գյուղացիներն այդ ժամանակ Բագրատաշենի շուկայում առեւտրով էին զբաղված: Հողերի սահմանների ճշտմանը խանգարում է նաեւ այն, որ 90-ական թվականների սկզբին յուրաքանչյուր դեղձավանցի 7-8 տեղ փոքր հողակտորներ է սեփականաշնորհել:
Հողերի հետ կապված խնդիր կա ոչ միայն համայնքի ներսում: 50 հա հողատարածք գտնվում է հայ-վրացական սահման հանդիսացող փշալարից այն կողմ: Այդ 50 հեկտարից 45-ը համայնքային նշանակության խոտհարքներ եւ արոտավայրեր են: Մնացած 5 հեկտարը սեփականաշնորհված վարելահող է: Դեղձավանցիները ռիսկ չեն անում փշալարից այն կողմ գտնվող հողերը մշակել, վախենում են բռնվել վրացի սահմանապահների կողմից եւ խոշոր տուգանքների ենթարկվել: Նման իրավիճակը գոյություն ունի 2007 թվականից:
Կարդացեք նաև
Մարզպետ Ա. Ղուլարյանն ասաց, որ կա փոխվարչապետ, տարածքային կառավարման նախարար Արմեն Գեւորգյանի հանձնարարականը` փշալարից անդին սեփականաշնորհված հողեր ունեցող դեղձավանցիներին փոխհատուցել, տալով գյուղի տարածքում գտնվող այլ հողեր:
Գյուղապետն ասաց, որ դեղձավանցիները համաձայն չեն նման ձեւով փոխհատուցմանը, քանի որ փշալարից այն կողմ գտնվող տարածքներն ամենաբերրի հողերն են: Նրանք ակնկալում են այդ հողերի համար պետությունից ստանալ դրամական փոխհատուցում:
Ընդհանուր առմամբ այս խնդրի պատճառով տուժում է 18 դեղձավանցի, չօգտագործվող տարածքների համար գումարներ չեն հավաքագրվում տեղական բյուջե: Իսկ փոքր համայնքի բյուջեն դրանց կարիքը շատ ունի: Դեռեւս 1994 թվականից գոյացել են հողի հարկի պարտքեր, որոնք ներկայումս կազմում են 2 միլիոն 902 հազար դրամ:
Ոսկան ՍԱՐԳՍՅԱՆ
