Այսօր կաշառք պահանջելու և ստանալու համար ձերբակալվել է արդարադատության նախարարության պետական պաշտոնյա։
Ինչպես հայտնում է ֆոտոլրագրող Գագիկ Շամշյանը, այսօր՝ փետրվարի 9-ին, ՀՀ ոստիկանության կազմակերպված հանցավորության դեմ պայքարի գլխավոր (6-րդ) վարչության աշխատակիցները, օպերատիվ միջոցառումներ իրականացնելիս, 4000 ԱՄՆ դոլար քաղաքացի Հայաստան Սահակյանից պահանջելու և ստանալու պահին, ոստիկանության ԿՀԴՊ գլխավոր վարչություն են բերման ենթարկել ՀՀ արդարադատության նախարարության «Գորիս» քրեակատարողական հիմնարկի (Գորիսի բանտ) պետի տեղակալ, արդարադատության մայոր, Գորիս քաղաքի 34-ամյա բնակիչ Մարեկ Հարությունյանին։
Գ. Շամշյանը հայտնում է, որ բանտի պետի տեղակալը Հ. Սահակյանից այդ խոշոր գումարը պահանջել և ստացել է այն բանի համար, որպեսզի նրա ամուսնուն, որն իր պատիժն է կրում «Գորիս» քրեակատարողական հիմնարկում, ճանաչել տա որպես հիվանդ, որպեսզի հետագայում նրան տեղափոխել տա ՀՀ ԱՆ «Դատապարտյալների հիվանդանոց» (ՑԲ)։
Փաստի առթիվ հարուցվել է քրեական գործ ՀՀ Քրօր–ի 311 հոդվածի (կաշառք ստանալը) հատկանիշներով։ Մ. Հարությունյանը ձերբակալվել է։ Ստեղծված նյութերը ոստիկանության ԿՀԴՊ գլխավոր վարչությունից ուղարկվել են Հայաստանի հատուկ քննչական ծառայություն։
