ԱԺ այսօրվա նիստը չփայլեց իր մարդաշատությամբ, թեպետ տեղի ունեցան մի քանի օրինագծերի քվեարկություններ: «Ժառանգություն» խմբակցության քարտուղար Լարիսա Ալավերդյանը նկատելով, որ ՀՀԿ-ական Արեգ Ղուկասյանը քվեարկում է ոչ միայն իր, այլեւ՝ կողքի բացակա ընկերոջ փոխարեն, դիտողություն արեց. «Հետաքրքիր պահ է, երբ ցանկացած էթիկայի օրինագիծ զրոյացվում է: Ես պնդում եմ, որ այստեղ չկա 67 պատգամավոր: Իմ առաջարկությունը՝ դիմել հաշվիչ հանձնաժողովին, մերժվում է: Իմ աչքով տեսնում եմ՝ պարոն Ղուկասյանը քվեարկում է եւս մեկ հոգու համար: Երբ տիկին Բախշյանն ասում է՝ գլուխներով են հաշվում, ոչ թե գլխաքանակ, որ վիրավորական լինի, այստեղ շատ դեմ են եղել, բայց այստեղ ստացվում է՝ երկու գլխանի մարդ կա. եթե մեկ գլխով հոգին քվեարկում է երկու հոգու համար, դա ի՞նչ է նշանակում: Եկեք պայմանավորվենք ու չկեղծենք»:
Մարգարիտ ԵՍԱՅԱՆ
