30-ամյա Արսենի այսօրվա վերլուծությունները անցնում են բանակային կյանքի պրիզմայով: Նա համարձակորեն նշում է, որ խիղճն ու հասուն մտածելակերպը իր մեջ ձևավորվել են բանակային կյանքում տեսածով ու հասկացածով:
Բակից հեռու…
Իմ կյանքում առաջին բաժանվելը, կտրվելը աշխարհիկ կյանքից (բանակը համարում եմ ուրիշ, ոչ աշխարհիկ կյանք) եղավ բանակը: Դուրս եկա մեր բակի «շուկայից», որտեղ ինձ շատ թանկ «սպառում» էի:
Ծառայությունը սկսված է…
Հավաքակայանում կատարվում էր բաժանումը: Փողոցը ինձ ճարպկություն էր սովորեցրել, եղածը ճոխացնել և երբեմն էլ ստել: Ես էլ ասացի, որ վարպետ-թիթեղագործ եմ (դզող-փչող): Ինձ առանձնացրին, և սպասվում էր հետաքրքիր ծառայություն` ըստ «մասնագիտության», բայց…
Օրենք N 1 – Չավլել
Մինչև բանակ գնալը, բոլորի կողմից, որպես թիվ մեկ խորհուրդ նշվում է չավլելը: Դրա համար ես վիճաբանությունների մեջ ընկա, ինչի արդյունքում ծառայությունս 90 աստիճանով փոխվեց: Սին, գաղափարական չավլելը իր մեջ կրում է «չընկնելու» իմաստը, բայց դա միայն թվում է: Այսօր ես աշխատանքս չկորցնելու համար շատ հաճախ զիջում եմ:
Նոր բացահայտումներ…
Գնդում որոշ ժամանակ ծառայելուց հետո հասկացա, որ խելացի չեմ, այլ ընդհամենը փորձում էի ինձ այդպիսին երևակայել: Փորձեցի դիմել խորամանկությունների, ինչի արդյունքում ընդհամենը…. տեղափոխվեցի հատուկ գունդ, որտեղ ծառայում են կարգազանցները:
Հատուկ գնդում, հատուկ երևույթներ…
Հատուկ գնդում դրական բաները քիչ էին. հեղինակություններ, ընկերոջ դիմակի տակ թաքնված հակառակորդներ, ինքնակոտորում: Դա ահավոր երևույթ է:
Միշտ էլ կարելի է ելք գտնել…
Այս ամենը տևեց 8 ամիս, այնուհետև սկսեցին կիրառել արգելքների մեթոդը: Այս տարբերակն ինձ վրա ազդեց: Եվ եղավ վերելքը … գրքերով: Չարենցի «Դանթեական առասպելը» և «Մահափորձեր, որոնք պետք է փրկեին աշխարհը» գրքերը օգնեցին ինձ վերլուծել կյանքս: Հասկացա, որ իրավիճակն ու դիրքերը պարտադրում են արարքները: Այսինքն իրավիճակից ելնելով կարելի է նաև ավլել: Սկսեցի ուրիշ քաղաքականություն վարել:
Նոր դիրք վաշտում…
Ես իմ դիրքը գտա վաշտում: Զբաղվում էի վաշտի «գրագիտությամբ»: Ստուգում էի նամակները, որոշների փոխարեն ինքս էի գրում, որ մեր վաշտի անունը բարձր պահենք: Այս շրջանում ծառայությունը հաճույք էր:
Եզրակացություններ…
Ցանկացած հարաբերություն կարելի է կարգավորել փոխադաձության հիմքի վրա: Ծառայության ընթացքում հասկացա, որ ամեն մեկի հետ պետք է խոսել իր լեզվով: Չեմ կարող, չի լինի բառերը ծառայության մեջ կիրառելի չեն: Չի լինում , ուրեմն պետք է հնարել, սովորել ու պարտադիր կարողանալ:
Որդիս առաջնորդ պետք է լինի…
Փոքր տարիքից որդուս մեջ առաջնորդ լինելու հոգեբանություն եմ զարգացնում: Ուզում եմ, որ առաջնորդ լինի դեռ բակից, և դա կօգնի նրան նաև բանակում: Այն խորհուրդները, որ ինձ են տվել, ես որդուս հաստատ չեմ տա:
Հարությունյան Արմինե
