ՀՀ վարչապետ Տիգրան Սարգսյանն այսօր խորհրդարանում պատասխանելով հարցին՝ ի՞նչ է մտածում «Կանխիկ գործառնությունների սահմանափակման մասին» օրինագծի քվեարկության տապալման եւ ԲՀԿ-ի այն պնդումների մասին, թե այդ օրինագիծը հարվածում է աղքատ խավին, ասաց.«Առաջինը, որ դա խփում է աղքատ խավերին, բացարձակ սուտ էր, այս օրենքի նպատակն է կանխիկ խոշոր շրջանառությունը դարձնել վերահսկելի եւ թափանցիկ, եւ խոսքը երեք միլիոնից ավելի գործարքների մասին է, իսկ մեր բնակչության 95 տոկոսը տարվա ընթացքում ընդհանրապես նման գործարքներ չի անում: Եթե ՀՀ քաղաքացին խանութից ձեռք է բերում կահույք, որի արժեքը 3 միլիոն դրամից բարձր է, ապա նա պարտավոր է այդ կահույքը ձեռք բերել անկանխիկ, որպեսզի հետագայում հնարավոր լինի վերահսկել այդ գործարքից ստացված եկամուտը եւ, որպեսզի տվյալ խանութը բոլոր գործարքները ներառի իր հաշվետվության մեջ եւ, որպեսզի վճարվեն բոլոր հարկերը:
Ստվերային տնտեսության դեմ պայքարի ամենաադյունավետ ձեւը հենց կանխիկ շրջանառության նվազեցումն է խոշոր գործարքների ժամանակ: Այս օրենքի նպատակը սա է: Այն պատճառաբանությունները, որ սա ուղղված է ֆինանսական համակարգի հարստացմանը, բանկերի հարստացմանը, բացարձակապես իրականությանը չի համապատասխանում, հակառակը, այս օրենքը բեռ է դնում բանկերի վրա, որովհետեւ պարտադրում է բանկերին, որ նրանք իրենց սեփական միջոցների հաշվին տեղադրեն տերմինալներ եւ այդ սպասարկումը իրականացնեն անվճար»:
Մարգարիտ Եսայան
ՀՀ վարչապետի այլ մեկնաբանությունները կարդացեք վաղվա տպագիր «Առավոտում»:
