Խորհրդարանի աշխատանքները երեկ սկանդալով սկսվեցին։ ԲՀԿ խմբակցության պատգամավորներից դահլիճ էր եկել միայն Նաիրա Զոհրաբյանը, որը նիստը սկսելուն պես հայտարարեց, որ ԲՀԿ-ն, հաշվի առնելով խորհրդարանում ստեղծված ոշ կոնստրուկտիվ մթնոլորտը, չի մասնակցելու խորհրդարանի աշխատանքներին:
Հանրապետականները անակնկալի եկան: «Տո լավ է՛», «Բա գնում էիք, շուտ գնայիք», «Է, վաբշե մի եկեք», «Էլ վաբշե չգայիք, ավելի լավ կըլներ»,– տեղերից սկսեցին արձագանքել նրանք։ Խոսքը, սակայն, միայն երեկվա նիստը բոյկոտելու մասին էր։ Հայտարարելով մեկօրյա բոյկոտի մասին՝ Զոհրաբյանը դուրս եկավ դահլիճից, քիչ անց՝ նաեւ ՍԺ շենքից, որտեղ, ի դեպ, երեկ այլ ԲՀԿ-ական չկար:
…Երեկ, երբ Նաիրա Զոհրաբյանին հարցրինք՝ իսկ վաղվա նիստին ԲՀԿ-ն մասնակցելո՞ւ է, պատասխանեց. «Մենք այսօրվա նիստին չենք մասնակցում, ես կարծում եմ, որ վաղվա նիստին կշարունակենք մեր աշխատանքը, որովհետեւ խորհրդարանը որեւէ մեկի սեփականությունը չէ»: Անդրադառնալով ԲՀԿ-ի եւ իր հասցեին ռեպլիկներ հնչեցրած ՀՀԿ-ական պատգամավորներին՝ Զոհրաբյանը ասաց. «Ռեպլիկ հնչեցնող տղամարդիկ ընդամենը ցույց են տալիս իրենց նվազ եւ նվաստ մակարդակը»:
Լուսինե ԲԱՐՍԵՂՅԱՆ
Կարդացեք նաև
«Հայկական ժամանակ»
