ՀՅԴ խմբակցության ղեկավար Վահան Հովհաննիսյանն այսօր հայտարարությունների ժամին անդրադառնալով Հայաստանի արտաքին քաղաքականությանը, խորհուրդ տվեց հաջողությունները չանձնավորել, ինչպես անում էին «Իլիչի ժամանակ»:
«Սենատում ձեռք բերված հաջողությունների մասին խոսելիս կարելի էր շնորհակալություն հայտնել այնտեղ 45 տարի դրա համար կռված մեր ժողովրդին, արտերկրի հայությանը, Հայ Դատի գրասենյակներին, բայց դա ցանկացածի ճաշակի գործ է»,- ասաց նա:
Անդրադառնալով կառավարության գործունեության ծրագրով նախատեսված եւ չկատարված աշխատանքներին` Վահան Հովհաննիսյանը նշեց, որ կառավարությունը պետք է ԱԺ-ին առնվազն զեկուցեր եւ, բացի միջազգային ճգնաժամն ու վատ բնակլիմայական պայմանները պատճառ բերելուց, նաեւ այլ, տրամաբանական պատասխաններ տար:
Նա հիշեցրեց, որ ՀՅԴ խմբակցությունը առաջարկել էր միասին դիմել Սահմանադրական դատարան` պարզաբանելու, թե ի՞նչ պիտի անի կառավարությունը, որը խոստումները չի կատարել` պիտի նոր ծրագի՞ր հաստատի, թե՞ անհրաժեշտ է նոր կառավարություն ձեւավորել: «Դրա համար պետք էր ընդամենը 27 ստորագրություն: Սակայն այս առաջարկությանը դրական արձագանքեց միայն «Ժառանգություն» խմբակցությունը: Մնացած խմբակցությունները չպատասխանեցին` հենց դրանով էլ, փաստորեն, ստանձնելով կառավարության գործունեության պարտակումը»,- ասաց ՀՅԴ խմբակցության ղեկավարը:
