Սյունիքի մարզպետարանի աշխատակազմի տեղեկատվության և հասարակայնության հետ կապերի բաժինը մարզպետարանի պաշտոնական կայքէջում քիչ առաջ կրկին հաղորդագրություն է տեղադրել «Առաջին լրատվական»-ի կայքում փետրվարի 3-ին տեղադրված «Սյունիքի մարզպետը լրագրողին սպիտակ ներքնաշորով զրույցի է հրավիրել» հոդվածի վերաբերյալ: Ըստ հաղորդագրության`շրջանառվող այդ ձայնագրությունը որևէ առնչություն չունի Սուրեն Խաչատրյանի հետ: «Ասվածի մեջ համոզվելու համար բավական է համադրել մարզպետի յուրաքանչյուր խոսք (ձայնագրված կամ տեսագրված) սփռված ձայնագրության հետ։ Համադրման արդյունքում, նույնիսկ առանց մասնագետ-փորձագետի եզրակացության, կարելի է վստահաբար համոզվել, որ ձայնագրության մեջ միանգամայն այլ մարդու խոսք է հնչում։ Խմբագրությունը, իբրև ապացույց, նշում է լրատվամիջոցի լոսանջելեսյան հեռախոսահամարը՝ 8186602206։ Տարրական բարոյականությունը, մինչդեռ, պահանջում էր տպագրել նաև այն հեռախոսահամարը, որից լրագրողը զանգահարել ու հետադարձ հեռախոսազանգ է ստացել։
Մեր ուսումնասիրությունից պարզվել է, որ «1in.am» էլեկտրոնային կայքի լրագրողը Լոս Անջելեսից զանգահարել է 093-00-00-77 հեռախոսահամարով, որտեղից և ստացել է հետադարձ զանգը։
Ի գիտություն լրատվամիջոցի խմբագրության (թեև խմբագրությունն այդ մասին գիտի ի սկզբանե)՝ այդ հեռախոսահամարը չի պատկանում (և չի պատկանել երբևէ) Սուրեն Խաչատրյանին, ինչը կարող է պարզել (ցանկության դեպքում) յուրաքանչյուր ոք։ Ի դեպ, հեռախոսահամարի բաժանորդը, նույն ինքը՝ լրագրողուհու կողմից գիշերային սադրիչ զրույցի մեջ ներքաշված անձնավորությունը, պատրաստ է այդ մասին առավել հանգամանալից ներկայացնել ամեն մի լրատվամիջոցի», – տեղեկացնում են պատասխանատուները։
Սույն հարցազրույցի վերաբերյալ մի պարզաբանում էլ տվել էին փետրվարի 6-ին եւ հայտարարել, որ ՀՀ Սյունիքի մարզպետ Սուրիկ Խաչատրյանը որևէ հեռախոսազրույց չի ունեցել Լոս Անջելեսում հրատարակվող «Ժամանակ» օրաթերթի և «Առաջին լրատվական»-ի թղթակցի հետ: Պատասխանատուները նշել են, որ հրապարկաված նյութն ամբողջությամբ կեղծիք է և ինչ-որ մեկի կողմից մոգոնված ու ուղղորդված հերթական զրպարտություն ՀՀ Սյունիքի մարզպետ Սուրիկ Խաչատրյանի դեմ եւ որպես ապացույց թույլատրել դիմել հեռախոսային օպերատորին` ստանալու համար 2012թ հունվար-փետրվար ամիսների մարզպետի հեռախոսահամարի մուտքային զանգերի վերաբերյալ տեղեկատվություն:
Մերի ՍՈՂՈՄՈՆՅԱՆ
