Հայ ազգային կոնգրեսին մաս կազմող ՍԴՀԿ-ն երեկ հանդես էր եկել հայտարարությամբ, որում Ռուսաստանի հայությանը կոչ էր արել ընտրել Վլադիմիր Պուտինին։ «Ազգակիցներ խնդրում և հորդորում ենք` ձեր ձայնը միացրեք իրական, հայրենասեր ռուսաստանցու ձայնին, որն ընտրելու է Վլադիմիր Պուտինին:
Եվ թող ձեր մտապատկերում պարզվի հետևյալ պաստառը. «Ընտրում ես Վլադիմիր Պուտինին` զորավիգ ես Մայր Հայրենիքիդ»,- ահա այսպես էր ՍԴՀԿ-ն եզրափակել իր կոչը ՌԴ հայությանը:
ՀԱԿ-ին մաս կազմող մեկ այլ՝ «Հանրապետություն» կուսակցության քաղխորհրդի նախագահ Արամ Սարգսյանն Aravot.am-ի հետ զրույցում հայտարարեց, թե չի կիսում գործընկեր կուսակցության դիրքորոշումը.
«Անձամբ ես դեմ եմ դրսից մեր ներքաղաքական կյանքին միջամտելուն ու նույն կերպ դեմ եմ, որ մենք միջամտենք Ռուսաստանի ներքաղաքական, ընտրական գործընթացներին: Ես ինքս ռուսական ընդդիմության կողմնակիցն եմ, բայց ես ուղերձներ չեմ հղում ՌԴ հայությանը»:
Կարդացեք նաև
Պատասխանելով մեր հարցին՝ արդյոք Պուտինի ընտրությամբ Հայաստանը կշահի՞, ինչպես դա ներկայացրել է իր գործընկեր կուսակցությունն իր հայտարարության մեջ, «Հանրապետության» նախագահն ասաց. «Ես բացարձակապես այդ կարծիքին չեմ: Ես ասում եմ, որ ինքս կողմնակից եմ, որ Ռուսաստանը դառնա ժողովրդավարական երկիր, որ Ռուսաստանում ժողովրդավարության վիճակը Հայաստանում տիրող վիճակից լավը չեմ համարում»:
Արամ Սարգսյանն ասաց նաեւ, թե այս հայտարարության վերաբերյալ Կոնգրեսում քննարկում չի եղել. «ՀԱԿ-ում եղած կուսակցություններն ազատ են սեփական տեսակետն ունենալու եւ կարծիք հայտնելու հարցում։ Նման հարցեր ՀԱԿ-ում չի քննարկվում եւ չպետք է էլ քննարկվի»:
