Մինչ կոալիցիոն յուրաքանչյուր հանդիպումից հետո իշխանական խոսնակները հայտարարում են «կոալիցիոն համերաշխության» մասին, երեկ ԱԺ-ում հերթական անգամ ապացուցվել է, որ կոալիցիան իրականում կախված է մազից։ «Կանխիկ գործառնությունների սահմանափակման» եւ նույն խնդրին վերաբերող՝ կառավարության ներկայացրած օրինագծերը երեկ ԱԺ-ում տապալվել են ԲՀԿ խմբակցության պատգամավորների չքվեարկելու պատճառով։ Իրականում խնդիրն այդ օրենքների բովանդակությունը չէ, այլ այն, որ ոչ այնքան սկզբունքային նշանակություն ունեցող օրինագծերն անգամ կոալիցիան չի կարողանում անաղմուկ անցկացնել։
Ընդ որում, երեկ զավեշտալի վիճակում են հայտնվել եւ ՀՀԿ-ականները, եւ ԲՀԿ-ականները, ովքեր լրագրողներին նախ հորդորել են կատարվածի մեջ ներկոալիցիոն «խմորումների հետք» չտեսնել, ապա հնչեցրել են իրենց գնահատականները։ «Ով խոսում է ժողովրդի անունից, հարկերի հավաքման արդարությունից եւ այդ խնդիրներով վաղը ժողովրդի առջեւ կանգնելով կուրծք է ծեծելու, պետք է գործնականում ապացուցեր իր խոսքի եւ գործի նույնությունը… Ընտրություններից մոտ երեք ամիս առաջ «Բարգավաճ Հայաստանի» այս քայլը ոչ այլ ինչ է, քան վատ կազմակերպված PR, եւ կոալիցիայի մաս կազմող կուսակցությունը փորձում է կառավարության օրինագծերը տապալելով՝ ընդդիմադիր ուժի համարում ձեռք բերել։ Թեպետ, պարզից էլ պարզ է, որ ԲՀԿ–ին չի հաջողվելու մոլորեցնել ընտրողներին եւ տարիներ շարունակ կառավարող կոալիցիային մաս կազմելուց հետո հառնել ընդդիմադրի կերպարով»,- սա մի հատված է օրինագծի տապալումից հետո ԱԺ նախագահ Սամվել Նիկոյանի ունեցած ելույթից։
«Դա կոալիցիոն պայմանավորվածությունների խախտում էր։ Կարծում եմ՝ օրենքը բավական լուրջ քննարկվել էր, որեւէ շահերի բախում չէր կարող լինել։ Դա հակակոռուպցիոն օրենքների շարքին է պատկանում, եւ, ըստ երեւույթին, քաղաքական որոշում են կայացրել»,- այսպես էլ կատարվածը գնահատել է ՀՀԿ խմբակցության ղեկավար Գալուստ Սահակյանը։
«Հարգելի գործընկերներ, «Բարգավաճ Հայաստան» խմբակցությունը չքվեարկեց, նա դեմ չէ օրենքի նախագծին, ուղղակի այն վաղաժամկետ է մեր հասարակության համար»,- փորձել է արդարանալ ԱԺ փոխնախագահ, ԲՀԿ-ական Սամվել Բալասանյանը։
Կարդացեք նաև
Մի խոսքով, ակնհայտ է, որ կոալիցիոն գործընկերներն արդեն մի կերպ են հանդուրժում մեկը մյուսին, եւ դա տեւում է այնքան ժամանակ, մինչեւ նախագահականում կայանում է հերթական հանդիպումը, եւ ՀՀԿ-ական ու ԲՀԿ-ական գործիչները «հանդուրժողականության» նոր չափաբւսժիններ են ստանում։ Կբավականացնի՞ հանդուրժողականության այդ «պաշարը» մինչեւ ԱԺ ընտրություններ։ Հազիվ թե։
«168 ժամ»
