Հարկային պետական ծառայությունը օրերս հրապարակեց նախորդ տարվա խոշոր հարկատուների ցանկը։ Խոշորների վճարները պետական բյուջե ավելացել են 51 մլրդ դրամով։
Սակայն այստեղ նկատվում են նաեւ մտահոգիչ երեւույթներ։ Ի հաշիվ ներմուծման, այսպես ասած, սեղմվում է ներքին արտադրությունը։ Պատահական չէ, որ բազմաթիվ արտադրողների հարկային պարտավորությունները նվազել են։
Այսպես, «Ավշարի գինու գործարանը» անցած տարի պետական բյուջեի նկատմամբ ավելի քան 500 մլն դրամով քիչ պարտավորություն է կատարել։ Հանքային ջրերի արտադրության ոլորտում հայտնի «Ջերմուկ գրուպը» իր հարկային վճարները նվազեցրել է շուրջ 300 միլիոնով։ Նախորդ տարվա համեմատ ավելի քիչ հարկային պարտավորություններ են կատարել գարեջրի արտադրության ոլորտում գործող ընկերությունները. «Երեւանի գարեջրի» դեպքում այն կազմում է 44 մլն դրամ եւ այլն։
Հարկային պարտավորությունների նվազումը ենթադրում է, որ կրճատվել են այս ընկերությունների արտադրության ծավալները։
Պատահական չէ, որ խոշորների ցանկի առաջին տասնյակում այս անգամ չկա տեղական արտադրության, այսպես ասած, զուտ հայկական որեւէ ընկերություն։
Առաջին տասնյակում միակ արտադրողը «Զանգեզուրի պղնձամոլիբդենային կոմբինատն» է։ Մնացած բոլոր ընկերություններն աշխատում են ներմուծման կամ ծառայությունների մատուցման ոլորտում։
Վասակ ԹԱՐՓՈՇՅԱՆ
«Հայոց աշխարհ»
