Թուրքիայի արտգործնախարարությունը երկուշաբթի օրը բողոք է ներկայացրել Շվեյցարիայի դեսպանին՝ Եվրամիության հետ կապերի հարցերով Թուրքիայի նախարար Էգեմեն Բաղըշի գործողությունների վերաբերյալ հետաքննություն սկսելու հանգամանքի կապակցությամբ:
«Ռոյթերս» լրատվական գործակալության փոխանցմամբ, Թուրքիայի արտգործնախարարության պաշտոնատար անձանցից մեկն ասել է, թե նման գործողություններն անընդունելի են, և «դեսպանը հրավիրվել է Թուրքիայի արտգործնախարարություն՝ բացատրություն ներկայացնելու համար»:
Հիշեցնենք, որ Ցյուրիխի դատախազությունը երկուշաբթի օրը Հայոց ցեղասպանության փաստը ժխտելու հայցով դատական գործ է հարուցել Եվրամիության հետ կապերի հարցերով Թուրքիայի նախարար Էգեմեն Բաղըշի դեմ:
Բաղըշի դեմ գործ հարուցելու համար հիմք է դարձել Շվեյցարիայի հայ համայնքի կողմից ներկայացված բողոքը:
Կարդացեք նաև
Ցյուրիխի դատախազ Քրիստին Բրաունշվայգն այս կապակցությամբ ասել է, որ «անցյալ շաբաթ բողոք է ստացվել, որից մենք տեղեկացրել ենք, թե Բաղըշը խախտել է Շվեյցարիայի քրեական օրենսգրքի՝ ռասիզմի դեմ պայքարին նվիրված 261-րդ հոդվածը»:
«Դատախազությունը լրջությամբ է վերաբերվում նման մեղադրանքներին, և բողոքի շուրջ քրեական գործ է հարուցվել», – հայտնել է Ցյուրիխի դատախազը՝ հավելելով. «Հետաքննություն կանցկացվի՝ պարզելու, արդյոք Բաղըշն արտասանել է Հայոց ցեղասպանությունը հերքող բառերը, ինչպես նշված է բողոքի մեջ: Բացի դրանից, մենք կուսումնասիրենք իր կողմից դիվանագիտական անձեռնմխելիություն ունենալու հարցը»:
«Ի վերջո, եթե նա իրոք խախտում է թույլ տվել և դիվանագիտական անձեռնմխելիությամբ պաշտպանված չէ, ապա մենք նրան մեղադրանք կներկայացնենք», – հայտնել է Ցյուրիխի դատախազ Բրաունշվայգը:
Բաղըշը որևէ մեկնաբանություն չի ներկայացնի այս հարցի շուրջ այնքան ժամանակ, մինչև դատախազության կողմից չավարտվի նախնական հետաքննությունը:
Ամերիկայի Ձայն
