Ավարտվեցին արձակուրդները, սկսվեց ուսումնական շրջանը: Երթուղային տաքսիները լիքն են ուսանողներով: Սրճարաններն ու արագ սննդի կետերն արդեն ակտիվացել են. ուսանողները դասի են: Նոր շունչ ստացավ տղաների կանգնելը համալսարանների դիմաց:
Զարուհին սիրում է ուսումնական շրջանը մի բանի համար, որ թարմություն է մտցնում իր կյանքի մեջ: Ուսանողական օրերին պատրաստվելու համար գնումներ է կատարում. «Նոր հագուստ ու կոշիկմ եմ առնում, իրենց աքսեսուարներով: Ու վերջապես ընկերներիս տեսնում եմ ամեն օր»: Արևիկը նոր հագուստի ու կոշիկի վրա ուշադրություն չի դարձնում, արդեն ձանձրացել էր տանը, կարոտել դասախոսներին, որքան հնարավոր է շուտ ցանկանում էր համալսարան մտնել. «Անգամ կարոտել էի լսարանի պատերը, դասերը ու անգամ խիստ դասախոսներին»:
Մանկավարժական համալսարանի դասախոս Ստեփան Մարությանը մեծ ոգևորությամբ է դասի գալիս, սիրում է իր աշխատանքը. «Միշտ ունեմ բարձր տրաբադրություն, անկախ ամեն ինչից, արձակուրդ է, թե դաս: Ամեն օր նոր ոգևորությամբ եմ մտնում լսարան»:
Մանկավարժական համալսարանի Կուլտուրայի ֆակուլտետը իր աշխատանքին է անցել: «Հունի մեջ արդեն մտել ենք»-, ասում է հեռուստալրագրության ամբիոնի աշխատողը:
Արմենին հանդիպեցինք համալսարանի միջանքում, տխրում է, որ մեկ ամիս հետո է նորմալ դասի հաճախելու. «Հիմա մեզ մոտ պրակտիկայի շրջան է», ասում է նա, իսկ համալսարան եկել է գործով, ու սիրելի դասախոսին տեսնելու:
Դասերին անհամբեր սպասող` Մելանյա Հարությունյան
