Տավուշի մարզում 47 հազար հա արոտավայր կա, որի մեծ մասը հեռագնա սարերում է եւ չի օգտագործվում գյուղատնտեսական նպատակներով: Այդ խնդիրը լուծելուն է ուղղված Համաշխարհային բանկի եւ ՀՀ կառավարության ֆինանսավորմամբ 2011թ. սկզբից իրականացվող «Համայնքների գյուղատնտեսական ռեսուրսների կառավարման եւ մրցունակության ծրագիրը»: Այն կշարունակվի մինչեւ 2015 թվականը:
Ծրագրում Տավուշի մարզից ընդգրկված է 10 համայնք. 6-ը՝ Իջեւանի, 4-ը՝ Նոյեմբերյանի տարածաշրջանից: Նախատեսվում է սարամասերում եւ համայնքների տարածքում անասունների համար խմելու ջրի ապահովում, սարերի աղբյուրների հենքի վրա անասունների ջրարբիացման հրապարակների կառուցում եւ խմոցների տեղադրում: Նախատեսվում է հեռագնա սարերի էլեկտրաֆիկացում: Մարզի 10 համայնքներում ստեղծվել են արոտօգտագործողների կոոպերատիվներ: Համայնքներում անասունների կերի լրացուցիչ բազա կստեղծվի, կոոպերատիվների անդամների հողերում կցանվի գարի՝ կորնգանի ենթացանքով: Ցանքի ծախսի կեսը կհոգա ծրագիրը, կեսը՝ ֆերմերը:
Նախատեսվում է նաեւ կոոպերատիվների համար ձեռք բերել «Բելոռուս» տրակտորներ՝ խոտհնձիչով, խոտ հավաքող մեխանիզմով եւ այլն: Կկատարվի էրոզիայի ենթարկված արոտավայրերի բարելավում. հողի մակերեսային շերտը տրակտորով կփոցխվի եւ շարքացանով կցանվեն խոտաբույսերի սերմեր: Ծրագրով նաեւ ֆերմերներին գյուղատնտեսական գիտելիքներ են ուսուցանվելու:
Մարտ-ապրիլ ամիսներին Իջեւանի Աղբղա սարում կսկսվի կաթի ընդունման եւ վերամշակման արտադրամասի շինարարությունը, 6 կոոպերատիվները կմիավորվեն, շենք կկառուցեն, կաթի ընդունման եւ վերամշակման սարքավորումները կտրամադրի ծրագրի իրականացման գրասենյակը: 10 համայնքներից յուրաքանչյուրում, ընդհանուր առմամբ, կարվեն 240 հազար դոլարի աշխատանքներ:
Կարդացեք նաև
Ծրագրի Տավուշի մարզային թիմի համակարգող Պավել Ցուցուլյանին հարցրի՝ մտավախություն չկա՞, որ սուղ բյուջե ունեցող համայնքները չեն կարողանա կատարել ծրագրի արժեքի 5% ներդրումները: Նա ասաց, որ համայնքների ղեկավարները հավաստիացրել են, որ ի վիճակի են պահանջվող ներդրումներն ապահովել: Խնդիրներ կարող են ծագել նաեւ կաթի ընդունման եւ վերամշակման արտադրամասի գործունեության հետ կապված:
Մի քանի տարի առաջ «Հայաստան» համահայկական հիմնադրամը Իջեւանի Ազատամուտ, Բերդի տարածաշրջանի Նորաշեն եւ այլ համայնքներում կաթի ընդունման կետեր բացեց: Դրանք մինչ օրս անգործության են մատնված:
Ոսկան ՍԱՐԳՍՅԱՆ
