Կենտրոն և Նորք-Մարաշ վարչական շրջանների ընդհանուր իրավասության դատարանում քննվում է 2011 թվականի հոկտեմբերի 20-ին ՀՀ Կառավարության դիմաց տեղի ունեցած միջադեպի կապակցությամբ ՀՀ նախկին ոստիկանապետ Ալիկ Սարգսյանին դեմ առ դեմ «Սարգսյան, խուլիգան» անվանած ՀԱԿ ակտիվիստ, «Բանակն իրականում» նախաձեռնության անդամ Վարդգես Գասպարիի գործը:
Դատավոր Մխիթար Պապոյանը նախ ծանոթացավ Գասպարիի անձնական տվյալներին, որից հետո պատասխանող կողմը հանդես եկավ միջնորդությամբ` բացարկ ներկայացնելու դատախազին: Ըստ պատասխանող կողմի, քննիչը պարտավոր էր գործով վկաներից վերցնել ցուցմունքներ, ինչը չի արել, իսկ ցուցմունքների մի մասն էլ չեն ներկայացվել մեղադրական եզրակացության մեջ: Վարդգես Գասպարին հայտարարեց, որ քննիչ Ա. Մանուկյանը մեղադրական եզրակացության մեջ թաքցրել է գործում առկա քաղաքացիներ Լալա Ասլիկյանի, Լենա Նազարյանի, Սոնա Այվազյանի ցուցմունքները, չի հարցաքննել սույն գործով վկաներ Լեւոն Բարսեղյանին, Արթուր Սաքունցին եւ Զարուհի Փոստանջյանին: Ըստ Գասպարիի, քննիչ Ա. Մանուկյանը խուսափել է նաեւ անդրադառնալ լրատվամիջոցների հրապարակումներին: «Վերահսկող դատախազը նույնպես աչք է փակել քննիչի ստելու հանգամանքի վրա եւ ակնհայտորեն թաքցրել է հանցագործությունը»,- նշեց Վարդգես Գասպարին` բացատրելով, թե ինչու է ինքը գոռացել «խուլիգան», «հանցագործ»: Ըստ նրա, Ալիկ Սարգսյանը հրել է ցուցարարներից մեկին եւ պատռել պաստառը:
Պաշտպան Ռոբերտ Ռեւազյանն էլ հայտարարեց, որ իր պաշտպանյալի կողմից ներկայացվածից հետեւում է, որ դատախազի կողմից անգործություն է դրսեւորվել, ինչը հիմք է տալիս ենթադրելու, որ այս գործով դատախազը կողմնակալ վերաբերմունք է ցուցաբերել:
Մեղադրող կողմը` դատախազ Արմեն Աֆանդյանը հայտարարեց, որ ինքը համաձայն չէ պատասխանողի հետ, միջնորդությունն անհիմն է եւ ենթակա է մերժման, քանի որ դատավարական որեւէ խախտում չի հայտնաբերվել: Այժմ դատարանը խորհրդակցական սենյակում է` քննարկելու միջնորդությունը, 5.30-ին կվերսկսվի նիստը:
Կարդացեք նաև
Մանրամասները կներկայացնեք քիչ հետո:
