Վաղը «Արամ Խաչատրյան» համերգասրահում տեղի կունենա համերգ` նվիրված Հայաստանի ժողովրդական արտիստ, երգիչ Ռուբեն Մաթեւոսյանի ծննդյան 70, եւ բեմական գործունեության 50 -ամյակին: Ինչպես այսօր լրագրողների հետ հանդիպմանը տեղեկացրեց համերգի գեղարվեստական ղեկավար Արմեն Մանուկյանը, ելույթներով հանդես կգան Երգի եւ պարի պետական անսամբլը, «Բարեկամություն» համույթը, Հանրային ռադիոյի ժողովրդական գործիքների համույթը, ինչպես նաեւ` Օֆելյա Համբարձումյանը, Ռաիսա Մկրտչյանը, Արման Հովհաննիսյանը, Նունե Եսայանը, Ալլա Լեւոնյանը, դաշնակահարուհի Անահիտ Ներսիսյանը եւ այլք: Ռուբեն Մաթեւոսյանն էլ շնորհակալություն հայտնեց իր հանդիսատեսին ջերմության համար, առանց որի այդքան զգացմունք չէր կուտակի. «Չպարծենամ, բայց 900-ից ավել երգի եմ ծնունդ տվել, երգել եմ յուրաքանչյուր հայի համար` բոլոր մայրցամաքներում»:
Ժողովրդական արտիստն իրեն երջանիկ արվեստագետ է համարում. «Բոլոր երգերս եղել են նպատակային, որպեսզի մարդկանց մեջ զարգացնեն սերը, գովերգեն կնոջն ու մորը, հայրենիքը»:
Արվեստագետը անդրադառնալով այլ երգիչների կողմից կատարվող իր երգերին՝ նշեց, որ դեմ չէ, բայց կցանկանար այդ կատարումներում սխալներ չտեսնել. «Ես ինձ թույլ չեմ տվել խմբագրել Սայաթ-Նովային կամ որեւէ կոմպոզիտորի: Դասականներին զգույշ պետք է վերարտադրել»:
Հոբելյարը հավելեց, որ իր բոլոր երգերն էլ իր համար սիրելի են. «Առաջին սերս եղել է երգը, այդ պատճառով ինձ համար «Առաջին սիրո երգն» առավել կարեւոր է»:
Կարդացեք նաև
Լուիզա ՍՈՒՔԻԱՍՅԱՆ
