Երևանի քաղաքապետ Տարոն Մարգարյանն աշխատանքային հերթական խորհրդակցության ժամանակ, անդրադառնալով մայրաքաղաքում ձնամաքրման աշխատանքներին, նշել է, որ չնայած վարչական շրջանների կենտրոնական և երկրորդական փողոցներն ամբողջությամբ մաքրված են եղել, սակայն մայթերի և բակային տարածքների հետ կապված որոշակի թերացումներ նկատվել են:
Հանրակրթության վարչության պետը զեկուցել է, որ դպրոց չհաճախող դպրոցահասակ երեխաների թվի և չհաճախելու պատճառների վերաբերյալ կատարվել են ուսումնասիրություններ, ինչպես նաև այցեր ու հանդիպումներ են կազմակերպվել ծնողների հետ: Ըստ այդմ դպրոցահասակներից մի քանիսը կվերսկսեն հաճախելիությունը դպրոց կամ համապատասխան հանրակրթական այլ հաստատություն: Նշվել է, որ ուսումնասիրությունների արդյունքում` պարզվել է, կան նաև այնպիսի երեխաները, որոնք դպրոցական լինելով հանդերձ`սոցիալական պայմաններից ելնելով մեծ թվով բացակայություններ ունեն:
«Եթե երեխաները հատկապես սոցիալական պատճառներից ելնելով չեն հաճախում դպրոց, ապա այդ խնդիրը ոչ միայն ընտանիքինն ու դպրոցինն է, այլև մեր քաղաքինը: Այդ նպատակով մենք պետք է հնարավոր ամեն ինչ անենք` աջակցելու այդ երեխաներին կրթություն ստանալու հարցում և պահենք մեր մշտական հոգածության տակ»,-նշել է Տարոն Մարգարյանը` հանձնարարելով համապատասխան վարչությունների աշխատակիցներին հավելյալ ստուգումներ կատարել և ապահովել երեխաների հաճախելիությունը:
Հասարակական տրանսպորտի կանոնակարգման նպատակով շարունակվող ամենօրյա հսկողության արդյունքում, ինչպես զեկուցել է տրանսպորտի վարչության պետը, հայտնաբերված մի շարք խախտումների մասով կազմվել են համապատասխան վարչական արձանագրություններ: Միևնույն ժամանակ «Միասին» երիտասարդական շարժման հետ համատեղ սկսվել է ավտոտրանսպորտային միջոցների սպասարկման մոնիտորինգ: Զեկուցվել է նաև, որ քաղաքապետի հանձնարարությամբ գույքագրված են մայրաքաղաքի վերանորգման անհրաժեշտություն ունեցող կանգառագոտիները, կանգառասրահներն ու կանգառանշանները: Հարցի հետ կապված Տարոն Մարգարյանը հանձնարարել է հանարվորին սեղմ ժամկետում կատարել պահանջվող վերանորոգման աշխատանքները:
Կարդացեք նաև
Ողջունելով մայրաքաղաքում առկա կանաչ գոտիների գույքագրման և ծառերի համարակալման աշխատանքների ընթացքը` քաղաքապետը հանձնարարել է շարունակել աշխատանքներն ու հետևողական լինել:
«Մենք պետք է ոչ միայն համարակալենք, այլև խնամենք ու պահպանենք մայրաքաղաքում առկա յուրաքանչյուր ծառ`անհրաժեշտության դեպքում այդ աշխատանքներում ներգրավելով նաև հասարական կազմակերպություններին»,-նշել է Տարոն Մարգարյանը:
Մայրաքաղաքում առկա հուշարձանների ու հուշատախտակների մաքրման աշխատանքները կազմակերպելու նպատակով հանձնարարվել է ներկայացնել համապատասխան ծրագիր:
Ըստ Երևանի քաղաքապետարանի տեղեկատվության և հասարակայնության հետ կապերի վարչության հաղորդագրության
