Պետական աջակցությամբ գյուղացիական տնտեսություններին շուկայականից էժան գներով ազոտական պարարտանյութ եւ դիզվառելիք է տրվելու: Ազոտական պարարտանյութի 50 կիլոգրամանոց պարկը տրվելու է 6000, իսկ դիզվառելիքի լիտրը` 350 դրամով: Շուկայում նման քանակի պարարտանյութի գինը 9000, իսկ դիզվառելիքի մեկ լիտրի գինը` 450 դրամ է: Տավուշի մարզի համայնքների ղեկավարները ելնելով իրենց համայնքների պահանջարկից` ներկայացրել են պարարտանյութի եւ վառելիքի նախնական հայտեր: Տավուշի մարզպետարանից գյուղապետերին հանձնարարական կա հնարավորինս կարճ ժամկետում ներկայացնել պարարտանյութ եւ վառելիք ստացողների ցուցակները եւ գումարները: Այդ գործը սկսվել է անցյալ շաբաթ, սակայն առաջ չի շարժվում: Գյուղացիները փող չունեն: Սահմանամերձ Դովեղ, Բարեկամավան, Բերքաբեր համայնքների ղեկավարներից տեղեկացա, որ դեռեւս գումարներ չեն հավաքագրվել: Գյուղապետերը սակայն մտադիր չեն հրաժարվել էժան պարարտանյութից եւ վառելիքից, քանի որ համագյուղացիները դրա կարիքը շատ ունեն:
-Վաղը Իջեւան եմ գնալու, գուցե մի բանկից վարկ վերցնեմ` համայնքին հատկացված դիզվառելիքի գումարը վճարելու համար: Եթե ոչ հատկացված 8 տոննան վառելանյութը, գոնե դրա մասը կվերցնենք: Նաեւ մտադիր եմ անտոկոս վարկի համար դիմել բարեգործների,-ասաց Բերքաբերի գյուղապետ Սուրեն Խուդավերդյանը:
Չի բացառվում , որ էժան պարարտանյութի եւ վառելիքի գումարները համայնքների ղեկավարներին կտրամադրեն գործարարները, ովքեր հետո նույն պարարտանյութն ու սոլյարկան կիրացնեն շուկայական գներով: Իսկ համայնքներում նորից հողերն անմշակ կմնան:
Ոսկան Սարգսյան
Կարդացեք նաև
