«Հայկական ժամանակ» օրաթերթի լրագրող Հայկ Գեւորգյանի ձերբակալման մասին այսօր քաղաքագետների միությունում կարծիքներ հայտնեցին քաղաքագետները: «Մենք մեր մտահոգությունն ենք հայտնում, առայժմ չենք շտապի կարծիքներ հայտնել, որովհետեւ պետք է պարզենք հանգամանքները, բայց ինչ էլ, որ եղած լինի, միեւնույնն է, եթե խոսքը վերաբերում է ճանաչված լրագրողի, ապա նրա նկատմամբ ինչ-ինչ պատժիչ քայլերը չեն կարող չանդրադառնալ մեր քաղաքացիների տրամադրությունների, նամանավանդ, որ շատ կասկածելի էր այդ պատահարը: Վերջին շրջանում նման բաներ էլի են լինում տարբեր մարդկանց, հատկապես որոնք քաղաքականապես ակտիվ են, բայց այստեղ խոսքը գնում է լրագրողի մասին»,- ասաց քաղաքագետների միության նախագահ Հմայակ Հովհաննիսյանը: Քաղաքագետ Արման Նավասարդյանն էլ կարծիք հայտնեց, որ լրագրողների նկատմամբ այդպիսի վերաբերմունքը բացասական մթնոլորտ է ստեղծում.« Չի նպաստում, որ հասարակության մեջ ստեղծվի այն մթնոլորտը , որը անհրաժեշտ է նախընտրական ժամանակաշրջանի համար: Ինչ վերաբերում է կոնկրետ Հայկ Գեւորգյանի դեպքին, ապա կարծում եմ, ավելի վատ ու ծիծաղելի կազմակերպված օպերացիա պատկերացնել չէր կարելի»:
Արփինե ՍԻՄՈՆՅԱՆ
