Քիչ առաջ ՀՀ արդարադատության նախարարության «Նուբարաշեն» քրեակատարողական հիմնարկ ժամանեց ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի քննիչ Աշոտ Ասատուրյանը։
Ինչպես «Նուբարաշեն» ՔԿՀ–ի մոտից հայտնում է ֆոտոլրագրող Գագիկ Շամշյանը, քննիչ Ա. Ասատուրյանի այցը ՔԿՀ կապված է «Հայկական ժամանակ» օրաթերթի պատասխանատու, լրագրող Հայկ Գևորգյանի նկատմամբ հարուցված քրեական գործի հետ: Ֆոտոլրագրողը հայտնում է, որ իր տեղեկություններով, քննիչը Հայկ Գևորգյանին ծանոթացնելու է ստեղծված նյութերին, որից հետո նա ազատ կարձակվի ստորագրությամբ՝ չբացակայելու պայմանով։ Այս մասին «Առավոտն» արդեն տեղեկացրել էր՝ հղում անելով դատախազության իր աղբյուրներին:
Այս պահին քննչական մեկուսարանի մոտ են հավաքվել Հայկ Գևորգյանի հարազատները, ընկերները, մտերիմները, «Հայկական ժամանակ» օրաթերթի ողջ խմբագրակազմը։
