Փետրվարի 2-ին Հաղարծին–Դիլիջան ճանապարհի մեծ մասը ծածկված էր ձյան հաստ շերտով ու մերկասառույցով: Ճանապարհի մաքրման աշխատանքներ չէին կատարվել: Նոյեմբերյան-Երեւան երթուղու միկրովտոբուսների վարորդները հայտնեցին, որ մի քանի տասնյակ «ֆուռեր», չկարողանալով առաջ շարժվել, ստիպված կայանել էին Դիլիջանի մուտքի «կալցեւոյի» հրապարակում, Դիլիջանի զինվորական զորամասի մոտ եւ ներկայումս չգործող «Քարավան»ռեստորանի առջեւի հրապարակում: Նույն օրը երեկոյան ճանապահի սպասարկումն իրականացնող Դիլիջանի «Հաղարծին» ՓԲԸ-ի մի բրիգադ աշխատել է Դիլիջանի ոլորանններում: Սակայն մեծ տարողությամբ բեռնատարներն մնացել են կայանած եւ միայն փետրվարի 3-ին, օրվա երկրորդ կեսին են կարողացել դեպի Երեւան շարժվել: «Դիլիջան» ՓԲԸ-ն իր կողմից սպասարկվող 58 կմ ճանապարհատվածի համար տարեկան բյուջեից ստանում է բավարար գումար` շուրջ 25 միլիոն դրամ,սակայն ձյան եւ սառույցի շերտից ճանապարհի մաքրումը պատշաճ չի կատարում: Դրա հետեւանքով վթարներ են լինում: Փետրվարի 4-ին, 16-ն անց 40-ի սահմաններում Բաթումիից Երեւան լամինատ տեղափոխող վրացական բեռնատարը Դիլիջանի ոլորանններում բախվել էր Երեւանի բնակչի «Վազ-2106» մեքենային: Դեպքի վայրում աշխատում էր ապահովագրական «Նաիրի ինշուրանս» ընկերության աշխատողը, տեղում էին նաեւ պետավտոտեսչության 2-րդ գումարտակի 4-րդ վաշտի 2-րդ դասակի աշխատակիցները: Բախումից ոչ մեծ չափով վնասվել էր «Ժիգուլին»: Վրացի վարորդն «Առավոտի» թղթակցին ասաց, որ սառած, ձյունապատ ճանապարհից իր վարած բեռնատարը հետ է սահել եւ հարվածել մարդատարին: Հավելենք, որ 2011թ. հոկտեմբերի 2-ին Այրումի մոտ ճանապարհի սողանքի հետեւանքով Վրաստանից Հայաստան բեռներ ներկրող խոշոր բեռնատարները հարկադրված են երթեւեկել Դիլիջանով: Փետրվարի 6-ի առավոտյան Դիլիջանի ոլորանները թեեւ անցանելի, սակայն երթեւեկության համար վտանգավոր էին:
Ոսկան Սարգսյան
Կարդացեք նաև
