Ձեր կարծիքով՝ ի՞նչ է խոստովանում կինը, երբ ասում է. «Ես գիտեմ, որ դժվարը հեշտացել է»: Իսկ ի՞նչ նկատի ունի տղամարդը, երբ ասում է. «Ես գիտեմ ճիշտ ձեւը»:
Փոքրիկ հարցում արեցինք՝ փորձելով պարզել, թե ինչ զուգադրություն են առաջացնում այս հարցադրումները: Ստացված պատասխաններից հրապարակման ենթակա է թերեւս միայն մի տարեց մարդու հառաչը. «Բայց ախր հեշտն էլ է դժվարացել, էդ էլ կա, չէ՞»:
Չշարունակենք հանելուկները: Սա մի ծրագրի հոլովակներն են, որոնցից ամեն մեկում բացատրվում է, թե, ասենք, «այժմ փոքր բիզնեսը կարելի է գրանցել ընդամենը 30 րոպեում՝ մոտենալով միայն մեկ պատուհանի կամ էլեկտրոնային եղանակով», կամ «Կատարելով 1 օրինական վճարում և հանձնելով 1 քննություն ՃՈ բաժանմունքում՝ կարելի է ստանալ վարորդական վկայական», «Ստուգում իրականացնող պետական մարմինների կողմից ստուգայցերի հաճախականությունը խիստ սահմանափակվել է» եւ այլն: Մի խոսքով, ինչ առաջ շատ դժվար էր՝ հիմա, ըստ այս հոլովակների՝ բավական հեշտացել էր:
Եվ հենց այս ծրագիրը նկատի ուներ վարչապետ Տիգրան Սարգսյանը, երբ ՀՀ կառավարության վերջին նիստում ասում էր. «Փետրվարի 1-ից զանգվածային լրատվական միջոցներով մենք սկսել ենք մի մեծ արշավ, որի նպատակն է էապես բարելավել պետության կողմից մատուցվող ծառայությունների որակը: Մենք ձեզ հետ միասին այս բնագավառում շատ հետևողական ենք եղել: Այս աշխատանքները տրամաբանական ավարտին հասցնելու համար մեզ անհրաժեշտ է, որպեսզի մեր քաղաքացիներն իրազեկված լինեն, թե ինչպիսի ծառայություններ ենք մենք նրանց մատուցում և ինչպիսի փոփոխություններ ենք իրականացնում այդ ծառայությունների որակը բարձրացնելու համար, որպեսզի այն իրավունքները, որոնք ունեն մեր քաղաքացիները, իրացվեն ամբողջությամբ: Դա նշանակում է, որ մեր քաղաքացիները պետք է իրազեկված լինեն շուրջ 18 գերատեսչությունների կողմից մատուցվող ծառայությունների վերաբերյալ, և մենք Համաշխարհային բանկի օժանդակությամբ սկսել ենք լայնածավալ իրազեկման ակցիա: Զանգվածային լրատվական միջոցները տեղեկացնելու են մեր քաղաքացիներին, թե ինչ նոր հնարավորություններ ենք նրանց համար ստեղծել, և ինչպես նրանք կարող են օգտվել այդ հնարավորություններից»:
Կարդացեք նաև
Ստեղծվել է հատուկ կայք, որտեղ տեղադրված են այս բոլոր հոլովակները եւ ամեն մեկի վերջում ասվում է, որ եթե քաղաքացին խնդիր ունի՝ կարող է զանգել: Կարող ենք պատկերացնել, թե ինչ ծանրաբեռնված է լինելու այդ հեռախոսահամարը: Մենք վերջին շրջանում էլ ենք բազմաթիվ բողոքներ լսել եւ վարորդական իրավունքի համար պահանջվող գումարների, եւ ստուգում իրականացնող մարմինների վերաբերյալ: Ուստի ուշադիր հետեւելու ենք, թե արդյոք լուծվելո՞ւ են նման խնդիրներն ահազանգերից հետո:
Իսկ մինչ այդ՝ մի հռետորական հարց. արդյոք եթե այդ «դժվարն» իրոք հեշտացել է կամ հեշտանա, քաղաքացիներին կարիք կլինի՞ հավելյալ իրազեկելու ու ծախսելու Համաշխարհային բանկի միջոցները, որոնց համար հաստատ ավելի արդյունավետ կիրառում կարելի կլիներ գտնել:
Ու շատ ավելի մի պարզ հարց՝ ո՞վ է եղել հայերենի ուսուցիչն այն մարդու, որը հղացել է. «Ես գիտեմ, որ դժվարը հեշտացել է» ոչ հայերեն նախադասությունը:
Աննա ԻՍՐԱՅԵԼՅԱՆ
