WBA, WIBF եւ WBO գոտիների տիրակալ, գերմանաբնակ թեթեւագույն քաշային Սյուզի Կենտիկյանը, նույն ինքը` «Մարդասպան Թագուհին», որ պրոֆեսիոնալ ռինգում ոչ մի պարտություն չի կրել, ձեռնոց է նետել սուպեր բռնցքամարտիկ Յեսիկա Յոլանդա Բոպպին:
«Տուտի» մականունով արգենտինացին, որ անցկացրած 19 մարտերում էլ հաղթել է (9-ը` ժամանակից շուտ), հանդես է գալիս Սյուզիից մեկ աստիճան ցածր քաշային կարգում ու չորս գոտի ունի:
Aravot.am-ի տեղեկություններով, նրանց միջեւ մենամարտը կարող էր կայանալ արդեն մարտ ամսին` Գերմանիայում եւ նժարի վրա պետք է դրվեին միայն Յեսիկայի գոտիները: Սակայն արգենտինացին դեռ վերջնական պատասխան չի տվել եւ մեր ունեցած տեղեկություններով` դրա դիմաց մտադիր է հաղթելու դեպքում պահանջել խոշոր գումար:
Մինչ Յեսիկան կկողմնորոշվի, իսկ մարտահրավերն ընդունելու դեպքում մրցակիցները Գերմանիայում կհանդիպեն արդեն տարվա երկրորդ կեսին, Սյուզին ներկայումս լրջորեն մարզվում է: Նա պատրաստվում է նույն մարտ ամսին մեկնել Սլովակիա եւ այնտեղ հանդիպել տեղի լավագույն բռնցքամարտիկներից մեկի հետ: Ճիշտ է, մրցակցի անունը դեռ հայտնի չէ: Ամենայն հավանականությամբ արդեն եկող շաբաթ Aravot.am-ը կիմանա նրա ով լինելը:
Աշոտ ՀԱԿՈԲՅԱՆ
