Հին փիլիսոփաներն են ասել, որ իմաստություն է մահվան մասին խոսելը: Շատերին է հուզում, թե կա՞ արդյոք հավիտենական կյանք, ինչ է մեզ սպասվում մահից հետո: Երանելի կյա՞նք, թե՞ այդ ամենը լավ հորինված առասպել է:
Այս եւ սրան հարող այլ հարցեր դարձել են վերջերս հրատարակված «Հոգեհանգստի խորհրդաբանություն» գրքի նյութը, որի հեղինակը Երեւանի Սուրբ Մարիամ Աստվածածին եկեղեցու դպիր Արամ Դիլանյանն է: Գրքում անդրադարձ կա աշխարհի արարչագործության, սուրբ հրեշտակների դասերի եւ ընկած հրեշտակների գործելակերպի մասին, ինչպես նաեւ Ահեղ դատաստանի:
«Առավոտի» հետ զրույցում Արամ դպիրն ասաց, որ գիրքը ոչ թե միայն իր երեւակայության պտուղն է, այլ հավաքված է Ընդհանրական եկեղեցու հոգեկիր վարդապետների երկերից, ծաղկաքաղի սկզբունքով եւ ամբողջովին ներկայացնում է Հայ առաքելական սուրբ եկեղեցու վարդապետությունը հանդերձյալի վերաբերյալ: Մեր զրուցակիցը նշեց նաեւ, որ պարզության համար նյութերը բերված են ժամանակակից մարդու մտածելակերպին հարմար շարադրանքով: Ասվում է, որ այս եւ նման հարցերի իրական պատասխանը կարող է տալ միայն եկեղեցին, քանի որ եկեղեցին երկինք է Երկրի վրա եւ իրենում ամբարված ունի այն ամենը, ինչ անհրաժեշտ է մարդուն: Այնուամենայնիվ, կա՞ հանդերձյալ կամ հավիտենական կյանք հարցին Արամ դպիրի պատասխանը հակիրճ էր. «Անկասկած՝ այո: Երկրորդ տարբերակ չկա»:
Մեզ հասած լուրը, թե այս հրատարակված գիրքն արդեն հասցրել է հայտնվել Երուսաղեմում եւ դառնալ Ժառանգավորաց վարժարանի դասագիրք, հաստատեց մեր զրուցակիցը, նշելով, որ սա իր երկրորդ աշխատությունն է. տարիներ առաջ Մայր աթոռ սուրբ Էջմիածնի քարոզչական կենտրոնի հրատարակչությունում ինքը հրատարակել է «Տերունի տոներ» աշխատությունը, որը նույնպես ծաղկաքաղի սկզբունքով է կազմված եւ վաղուց արդեն ընդունվել է որպես դասագիրք Էջմիածնի Գեւորգյան հոգեւոր ճեմարանի կողմից: Անդրադառնալով «Հոգեհանգստի խորհրդաբանությանը», Արամ դպիրը հույս հայտնեց, որ այս աշխատությունը գուցե առիթ դառնա նոր հարցադրումների, խորհրդածությունների ու քննարկումների, որին պատրաստ է մասնակցել ինքը:
ՍԱՄՎԵԼ ԴԱՆԻԵԼՅԱՆ
