Երեկ իր ասուլիսում «Եվրանեսթում» հայաստանյան պատվիրակության ղեկավար, ՀՀ ԱԺ ՀՅԴ խմբակցության պատգամավոր Վահան Հովհաննիսյանը կարեւորեց այս կառույցի քաղաքական հանձնաժողովի նիստը, որին հրավիրված է եղել նաեւ ԵԱՀԿ/ԺՀՄԻԳ-ի պատասխանատու Ջուլիա Մարտինը: «Նա հաստատեց, որ Հայաստանում ընտրությունների ժամանակ միջազգային դիտորդների բավականին լուրջ ներկայություն է լինելու՝ ԵԽ, ԵԽԽՎ եւ ԵԱՀԿ, եւ որ նրանք աշխատելու են ընդհանուր թիմի գաղափարով: Ընդ որում, խոսելով խորհրդարանի համամասնական-մեծամասնական ընտրակարգերի մասին՝ Մարտինն ասել է, թե դա յուրաքանչյուր երկրի ներքին գործն է, բայց այս անգամ արեց մի շատ կարեւոր հայտարարություն. ասաց, որ առաջնահերթ է կուսակցությունների ազատ մրցակցության հնարավորությունը, եւ այն ամենը, ինչը դրան խանգարում է, պետք է Ընտրական օրենսգրքերում փոխվի»,- ասաց Հովհաննիսյանը՝ հավելելով, թե ակնհայտ է, որ ՀՀ-ում մեծամասնականի առկայությունն ընտրություններում կուսակցությունների հավասար մրցակցության սկզբունքին հակասում է:
«Առավոտ» օրաթերթ
