ԵՊՀ արեւելագիտության ֆակուլտետի փոխդեկան, թուրքագետ Ռուբեն Մելքոնյանը կարծում է, որ Թուրքիան դարձել է իր իսկ հռչակած սկզբունքների պատանդը.«Հայոց ցեղասպանության ժխտողականությունը, մերժումը, որը Թուրքիայի արտաքին քաղաքականության կարեւոր կետերից է, այսօր պատանդի վիճակում է դնում նույն Թուրքիային, եւ Թուրքիան ահռելի քաղաքական, վարչական, ֆինանսական ռեսուրսներ է կիրառում, որպեսզի ամեն անգամ նման օրինագծեր (նկատի ունի Ֆրանսիայի Սենատի ընդունած օրինագիծը` ցեղասպանության ժխտումը քրեականացնելու մասին-Մ.Բ.), ամեն ապրիլի 24-ից առաջ նմանատիպ հայտարարություններ կանխի, եւ սա թուրքական քարոզչական մեքենայի համար դարձել է մեծ հոգս, թուրքական քաղաքական մեքենան դարձել է իր իսկ հռչակած սկզբունքի պատանդը եւ զոհը, եւ սա արդեն սկսում է հասկանալ թուրքական հասարկության որոշակի մասը»: Բացի այդ, ըստ թուրքագետի, «Թուրքիան իր ագրեսիվ պահվածքով նպաստեց հայոց ցեղասպանության քարոզչությանը, եւ համաշխարհային մամուլն ու հասարակությունը Թուրքիայի հիստերիկ պահվածքի արդյունքում ավելի շատ լսեց Հայոց ցեղասպանության մասին: CNN-ը, BBC-ն եւ այլ համաշխարհային ԶԼՄ-ներ իրենց թողարկումներում, կիրառելով «Հայոց ցեղասպանություն» եզրույթը, անդրադառնում էին խնդրին, պատմական էքսկուրս էին անում, վերլուծում էին: Կարող ենք հստակ ասել, որ Թուրքիան քարոզչական դաշտում իր այս քայլերով ինքն իր դեմ էր աշխատում»:
