Փաստաբանների պալատի անդամ, «Մարտի 1»-ի գործով բազմաթիվ նախկին քաղբանտարկյալների պաշտպան Վարդուհի Էլբակյանը Aravot.am-ի հետ զրույցում հաստատեց մեր ունեցած տեղեկությունն այն մասին, որ Հայ ազգային կոնգրեսը, հակառակ իր խոստմանը, չի վճարել մասնավորապես իր մատուցած ծառայությունների դիմաց: Նա այս առնչությամբ միայն որոշակի պարզաբանումներ տվեց` խոստանալով առաջիկայում հանդես գալ հայտարարությամբ կամ հանդիպել ԶԼՄ-ների ներկայացուցիչների հետ:
Իսկ մինչ այդ փաստաբանը պատրաստվում է հանդիպել նաեւ ՀԱԿ ներկայացուցիչներին, որովհետեւ այնտեղ էլ էին սպասում իր վերադարձին, ու ինքն էլ, իր ձեւակերպմամբ` ՀԱԿ-ին շատ հարցեր ունի տալու: Մեր հարցին, թե ճշմարտություն կա՞ր արդյոք այն տեղեկության մեջ, որ ձեզ ձեր աշխատանքի համար չի վճարվել` պատասխանեց. «Այո, բայց ոչ թե Սուրեն Սիրունյանի, այլ Տիգրան Առաքելյանի գործով: Իրոք, նման բան կա, բայց ոչ Սիրունյանի բողոքի հետ կապված»:
Մեր հաջորդ հարցին` արդյոք Ձեր գույքի վրա դրված կալանքը կապ ունի՞ այս չվճարումների հետ, Էլբակյանն այսպես արձագանքեց. «Այո, կապված Տիգրան Առաքելյանի գործի հետ: Հիմա էլ դատական գործ կա, որով Տ. Առաքելյանը բողոք է ներկայացրել ընդդեմ ոստիկանության ներկայացուցիչների: Մենք պայմանավորվածություն ունեինք, որ իրենք (ՀԱԿ-ում) վճարելու էին, եւ ինձ այս աղմուկը պետք չէր, ու այս ամենը իրենց ոչ ճիշտ ժամանակին վճարելու պատճառով է: Ի՞նչ է, Կոնգրեսը 600 հազար դրամ չունի՞, որ վճարի: Ես բազմաթիվ անգամ եմ պարոն Ջհանգիրյանի հետ խոսել: Ինձ ուղղակի վրդովվեցրեց այն հանգամանքը, որ հրապարակվել էր իմ նամակը Արմեն Խաչատրյանին, նշվել էր, թե ես նամակում ինչ-որ քաղբանտարկյալի անուն եմ տվել, ում անունն իրենք չեն ուզում հրապարակել: Ես ընդհանրապես որեւէ այլ մարդու անուն չեմ նշել: Իմ հաջորդող տողերը եղել են` «Սուրենը այս ամենի հետ կապ չունի: Երբ եկա, ճշմարտությունը կասեմ»: Ընդամենը սա է նամակում: Սա է ինձ վրդովվեցրել, որ իրենք ինչ-որ չակերտներ են թողել, «իքսեր» են թողել, որ մարդկանց վրա տպավորություն թողնեն, որ մարդիկ մտածեն`տեսնես ի՞նչ է գրված եղել այնտեղ: Իսկ ի՞նչ պիտի լիներ»:
