Իջեւանի հեռուստաընկերության եւ այդ հեռուստաընկերության լրագրող Նաիրա Խաչիկյանի դեմ հայցով դատը շուրջ կես տարի շարունակվում է, դրա ավարտն էլ դեռ հեռու է:
Հիշեցնենք, որ 2011թ. հուլիսին «Իջեւանի ՃՇՇ» ՓԲԸ-ն Տավուշի մարզի դատարան հայց էր ներկայացրել «Իջեւանի ստուդիա» ՍՊ ընկերության եւ այդ հեռուստաընկերության լրագրող Նաիրա Խաչիկյանի դեմ`պահանջելով պարտավորեցնել Ն. Խաչիկյանին եւ «Իջեւան ստուդիային» հրապարակավ ներողություն խնդրել եւ հօգուտ «Իջեւան ՃՇՇ» ՓԲԸ-ի, Ն. Խաչիկյանից եւ «Իջեւան ստուդիա» ՍՊԸ-ից համապարտությամբ բռնագանձել 3 միլիոն դրամ` որպես փոխհատուցում, եւս 264 հազար դրամ (որպես դատական ծախս), որից 200 հազար դրամը` փաստաբանին վճարած վարձատրության գումար եւ 64 հազարը` որպես վճարված պետական տուրքի գումար:
Հայցադիմումի մեջ նշված է, որ 2011թ. հունիսի 21-ին, Հ2-ի «Լրաբեր» լրատվական ծրագրով, ինչպես նաեւ «Երկիր Մեդիա» հեռուստաընկերությամբ մի քանի անգամ հեռարձակվել են տեսանյութեր, որոնց մեջ տեղ են գտել «Իջեւանի ՃՇՇ»-ի գործարար համբավն արատավորող կեղծ տեղեկություններ:
Դատը սկսվել էր 2011թ. օգոստոսի 18-ին, Տավուշի մարզի առաջին ատյանի դատարանի Դիլիջանի նստավայրում: Կայացել էին մի քանի նիստեր, սպասվում էր, որ նոյեմբերին դատավոր Արշակ Շահոյանը կհրապարակի վճիռը: Սակայն դատը գրեթե ավարտված` դատավորը փոխվեց:
Կարդացեք նաև
Հունվարի 20-ին Իջեւանում դատավոր Արման Կուրեխյանը «նոր տողից» սկսեց դատը: «Իջեւանի ՃՇՇ» ՓԲԸ-ի շահերի պաշտպանությամբ հանդես է գալիս փաստաբան Նաիրա Խաչատրյանը, Նաիրա Խաչիկյանի շահերը պաշտպանում է փաստաբան Գարիկ Գալիկյանը: Նաիրա Խաչիկյանը նախկինի նման դատին չի ներկայանում: «Իջեւան ստուդիան» դատարանում ներկայացուցիչ, փաստաբան չունի, հեռուստաընկերության ներկայացուցիչները երբեւէ չեն մասնակցել նիստերին:
Փետրվարի 3-ի նիստին Գարիկ Գալիկյանը փաստաթուղթ չէր ներկայացրել, թե Նաիրա Խաչիկյանը «Իջեւան ստուդիայում» ինչ կարգավիճակ ունի: Գալիկյանը միջնորդեց, որ հայցի ապահովման համար որպես խափանման միջոց ընտրված Նաիրա Խաչիկյանի բնակարանի եւ դրամական միջոցների վրա դրված դատական արգելանքը մասամբ փոխվի, մնա միայն բնակարանի վրա դրված արգելանքը: Հայցվորի ներկայացուցիչ Նաիրա Խաչատրյանը դրան հակադարձեց, որ դատարանին հայտնի չէ` լրագրողն այդ բնակարանի ո՞ր մասի սեփականատերն է, արգելանքն էլ դրված է միայն 3 միլիոն դրամի չափով: Դատարանը ավարտեց նախնական նիստերը եւ դատաքննության առաջին նիստը նշանակեց փետրվարի 24-ին:
Ոսկան ՍԱՐԳՍՅԱՆ
