Վերջին շրջանում հանրապետության մի շարք դպրոցներում «կարմիր բերետավոր» ոստիկաններ են շրջում: Պարզվում է՝ նրանց հրավիրում են դպրոցների տնօրենները: Այս մասին այսօր «Հայելի» ակումբում կայացած մամուլի ասուլիսի ժամանակ հայտնեց ոստիկանության քրեական հետախուզության 3-րդ վարչության պետի տեղակալ, ոստիկանության գնդապետ Նելլի Դուրյանը:
Նրան այս գաղափարը, սակայն, այնքան էլ դուր չի գալիս. «Ինձ համար ավելի ընդունելի է դպրոցներում տեսուչների ներդրման մոդելը, որի շնորհիվ շատ հանցագործություններ կկանխվեն»:
Նելլի Դուրյանի խոսքերով, անչափահասների գծով արդեն իրականացվում է բարեփոխումների ծրագիր: Ըստ նրա, ոստիկանապետի կողմից տրվել է հանձնարարական, լինել դպրոցներում, հանդիպումներ ունենալ երեխաների, ինչպես նաեւ մանկավարժների հետ եւ կանխարգելիչ աշխատանքներին ավելի շատ ուշադրություն դարձնել. «Նախկինում էլ ենք եղել դպրոցներում, սակայն հիմա ավելի շատ կլինենք»:
Նա ներկայացրեց, որ իրենք մասնավոր զրույցներ են ունենում աշակերտների հետ, պատասխանում նրանց հարցերին. «Նրանք, օրինակ, հարցնում են, թե որ հանցագործության դեպքում ինչ պատիժ է սահմանվում»: Նելլի Դուրյանի կարծիքով, երեխաները հաղորդակցվելու հետ կապված խնդիր ունեն. «Նրանք որեւէ խնդիր ունենալու դեպքում, անմիջապես բռունցքներն են գործի դնում, կամ օգտագործում ձեռքի տակ եղածը»:
Կարդացեք նաև
Ըստ ոստիկանության պաշտոնյանի, Հայաստանում անչափահասների կատարած հանցագործությունների թիվը նախորդ տարվա համեմատ աճել է՝ 2011-ին արձանագրվել է 453 անչափահասների կողմից գործած 527 հանցագործություն, իսկ 2010-ին գրանցվել էր 452 անչափահաս երեխաների կողմից կատարված 509 հանցագործություն. «2010-ին անչափահասի կողմից մարդասպանության դեպք չի արձանագրվել, իսկ 2011-ին գրանցվել է 3 նման դեպք»: Չնայած դրան, Նելլի Դուրյանը նշեց, որ անչափահասների գաղութում այս պահին պատիժ է կրում ընդամենը 16 անչափահաս. «Սրանք ծանր հանցագործներ են: Մյուսների պարագայում կիրառվում է համապատասխան հոդված, եւ նրանց արդարադատության նախարարության հսկողության ներքո տրվում է այլընտրանքային պատիժ»:
Խոսելով անչափահասների նկատմամբ սեռական բռնության մասին՝ տիկին Դուրյանը նկատեց, թե չի կարելի ասել նման ոտնձգությունները, որ միայն իրականացվում են անապահով խավի երեխաների նկատմամբ. «Ուղղակի սեռական բնույթի նման դեպքերին լրատվամիջոցներն ավելի շատ են արձագանքում, դրանք պարտադիր չէ, որ անապահով ընտանիքներից լինեն»: Ըստ նրա՝ ավելացել են անչափահաս երեխաների ինքնասպանության փորձերի դեպքերը. «2010-ին 41 անչափահաս էր փորձել վերջ դնել իր կյանքին, որոնցից մահվան ելքով է ավարտել 13-ը, իսկ անցած տարի նման քայլի է դիմել 45 անչափահաս՝ մահվան 9 ելքով: Ինքնասպանության դեպքերի հիմնական մասը 16-17 տարեկան աղջիկ երեխաներն են՝ կապված, օրինակ, նրանց սիրահարվածության հետ: Ինքնասպանության փորձ կատարած անչափահասներից ամենափոքրը 14 տարեկան է եղել»:
Անուշ ԽԵՉՈՅԱՆ
