ՀՀ նախկին արտգործնախարար Վարդան Օսկանյանն իր հայտարարության մեջ կոչ էր արել ԱԺ 100 տոկոս համամասնական ընտրակարգի շուրջ համախմբված ուժերին՝ քաղաքացիական շարժում ձեւավորել։ Ի՞նչ եք կարծում, ո՞ւմ հրահանգով է նա այդպիսի հայտարարություն արել։ Այսօր, ԱԺ-ում հրավիրած իր ասուլիսում, պատասխանելով լրագրողներից մեկի այս հարցին, ՀՅԴ խմբակցության ղեկավար Վահան Հովհաննիսյանը նախ ասաց, թե ինքը հակված չէ ամեն ինչ պայմանավորել կոնսպիրոլոգիայով եւ հավելեց, թե՝ «կարող ա մարդը մի բան էլ ինքնուրույն ա ասել, առանց հրահանգի»:
Անդրադառնալով նախկին նախարարի հայտարարությանը, ինչպես Հովհաննիսյանը ձեւակերպեց՝ էությանը, պատգամավորն ասաց, թե էականն այն է, որ թե այդ ուժերը, թե ինքը՝ Օսկանյանը, այդ շարժման նկատմամբ բոլորովին այլ պատկերացումներ ունեն, ուստի պետք է նախ հասկանալ, թե ինչ տեսակի շարժման մասին է խոսքը։ «Եթե խոսքը գնում է շարժման մասին, որը արդար ընտրություններ է պաշտպանում՝ այստեղ, կարծում եմ, վեճ չկա։ Բայց եթե այդ շարժման տակ հասկացվում է քաղաքական կամ կազմակերպական դաշինք՝ ապա այստեղ սկսվում են տարաձայնություներ, եւ իհարկե, հարցը պետք է քննարկվի, բայց այն բանից հետո, երբ հասկանանք, թե կոնկրետ հայտարարություն անող Օսկանյանն ինչ օրակարգ է ենթադրում նման շարժման համար»։
Նաիրա ՄԱՄԻԿՈՆՅԱՆ
