Այս կառուցապատողի դեմ դատարաններում տասնյակ գործեր կան
Ի թիվս հանուն պետական շահի իրացված գոտու այլ բնակիչների՝ մոտ երկու ամիս առաջ Եվրադատարան է դիմել նաեւ Աբովյան, Նալբանդյան եւ Արամի փողոցներին հարող տարածքում կառուցապատում իրականացնող «Ավո Ֆ.Մ.Հ.»-ից տուժած քաղաքացի Ալբերտ Բաբաջանյանը: Նա այդ քայլին է գնացել, քանի որ իր բնակարանին առնչվող հարցում Հայաստանի դատական համակարգից ոչ մի արդար լուծում չի ստացել: Պարոն Բաբաջանյանը հույս ունի, որ գոնե այդ ճանապարհով կառուցապատողին կստիպի պայմանագրով ամրագրված պարտավորությունները կատարել եւ նոր բնակարանում առկա թերությունների համար էլ 17 միլիոն դրամի չափով տուգանք վճարել: Նա, ձեռքի տակ ունենալով դրա համար անհրաժեշտ բոլոր ապացույցները, «Ավո Ֆ.Մ.Հ.»-ից նաեւ պահանջում է իրեն տալ շենքի նախագծով նախատեսված բաց պատշգամբով բնակարանը:
Ինչպես Ա. Բաբաջանյանը պատմեց մեզ հետ զրույցում, մեր երկրի դատական բոլոր ատյաններում նրա հայցը չի բավարարվել: Նա այդպես էլ չի կարողացել ապացուցել, որ նախագծով եւ պայմանագրով իրեն պետք է գոնե բաց պատշգամբով բնակարան հատկացնեին: Նա հիմա իր ձեռքի տակ ունի Երեւանի քաղաքապետարանում «Ավո Ֆ.Մ.Հ.»-ի ներկայացրած բնակելի շենքի նախագիծը, որով հաստատվում է, որ կառուցապատողը Նալբանդյան 7/1 հասցեում «Ա» մասնաշենքի բնակարանները, բացի առաջին հարկից, պետք է բաց պատշգամբներ ունենային:
Բացի այն, որ «Ավո Ֆ.Մ.Հ.»-ն պայմանագրով սահմանված պարտավորությունները պատշաճ կերպով չի կատարել, բոլոր դատական ատյաններով հակընդդեմ հայց է ներկայացրել քաղաքացու դեմ՝ իբրեւ թե մի բան էլ քաղաքացին է մեղավոր, որ այդ բնակարանի սեփականատեր չի դառնում:
Կարդացեք նաև
Նշենք, սակայն, որ Ա. Բաբաջանյանն իր նորակառույց բնակարանը պետք է ստանար դեռեւս 2010 թվականին, մինչդեռ շենքը նախատեսվածից բավականին ուշ է շահագործման հանձնվել, իսկ քաղաքացու բնակարանն էլ նախագծային շեղումներով է եղել եւ բոլորովին այլ տեսք է ունեցել: Նրան բնակարանը մատուցել են առանց բաց պատշգամբի, ծխատարների եւ օդափոխման խողովակների, բացի այդ՝ չի պահպանվել պայմանագրով սահմանված 50քմ ընդհանուր տարածքը: Հենց այդ թերությունները հաշվի առնելով էլ՝ Ա. Բաբաջանյանը հրաժարվել է բնակարանի սեփականատեր դառնալ: Այս եւ «Ավո Ֆ.Մ.Հ.»-ից տուժածների եւ դատական նիստերի թեմային «Առավոտն» արդեն մի քանի անգամ անդրադարձել է (27.04.2010.թ., 09.06.2010թ., 26.06.2010թ., 26.01.2011թ.):
Նշենք, որ Ալբերտ Բաբաջանյանը նախկինում բնակվել է Աբովյան 4/6 հասցեում, որը պետական կարիքների համար իրացվել է եւ տրվել «Ավո Ֆ.Մ.Հ.»-ին, վերջինս էլ պարտավորվել է տարածքի նախկին բնակիչ Ա. Բաբաջանյանին հանձնել իր կողմից կառուցվող բնակելի շենքից բնակարան:
Այսօր դատարաններում ընդդեմ «Ավո Ֆ.Մ.Հ.»-ի մի շարք հայցեր կան, որոնց ելքը, սովորաբար, հօգուտ կառուցապատողի է լինում:
ԱՆՈՒՇ ԽԵՉՈՅԱՆ
«Առավոտ» օրաթերթ
